Alternative Funeral Service - Yr Eglwys yng Nghymru

Gwasanaethau Angladd
Dyro inni yn awr y nerth a’r dewrder
i’w g/adael yn dy ofal di,
yn llawn hyder yn dy addewid o fywyd tragwyddol
trwy Iesu Grist ein Harglwydd. Amen.
18.
Dduw a Thad tragwyddol,
molwn di am iti lunio pobl i rannu bywyd â’i gilydd
ac i adlewyrchu dy ogoniant yn y byd.
Diolchwn iti yn awr am E.
am y cyfan a welsom o’th ddaioni di yn ei f/bywyd
ac am y cyfan a olygai i bob un ohonom.
Wrth i ninnau deithio at farwolaeth
bydded inni wneud hynny yng nghwmni Iesu,
a ddaeth i rannu ein bywyd
fel y rhannem ninnau yn y bywyd tragwyddol.
Iddo ef, gyda thi a’r Ysbryd Glân,
y bo’r gogoniant
yn oes oesoedd. Amen.
19.
Arglwydd Dduw, creawdwr pob peth,
gwnaethost ni yn greaduriaid y ddaear hon,
ond addewaist inni hefyd ran yn y bywyd tragwyddol:
derbyn yn awr ein diolch a’n moliant
am fod dy blentyn, ein brawd/chwaer, E.,
yr ydym yn ei g/chyflwyno heddiw i’th ddwylo,
yn cyfranogi gyda’th saint yn llawenydd y nefoedd,
lle nad oes na galar na phoen
ond bywyd hyd byth. Alelwia! Amen.
20.
Hollalluog Dduw,
yr wyt yn caru pob peth a wnaethost
ac yn ein barnu â thrugaredd a chyfiawnder diderfyn.
Llawenhawn yn dy addewidion o faddeuant
a llawenydd a thangnefedd i bawb sy’n dy garu.
Yn dy drugaredd tro dywyllwch marwolaeth
yn wawr bywyd newydd
a galar y gwahanu yn llawenydd y nefoedd;
trwy ein Hiachawdwr Iesu Grist,
a fu farw ac a gyfododd drachefn ac sy’n byw byth mwy. Amen.
21.
Hollalluog Dduw,
deuwn atat ti, y barnwr goruchaf,
ac at Iesu, cyfryngwr y cyfamod newydd,
ac at ysbrydoedd y cyfiawn a berffeithiwyd;
diolchwn iti am roddi inni deyrnas ddi-sigl
ac addolwn di gyda pharchedig ofn,
trwy Iesu Grist ein Harglwydd. Amen.
Tudalen 57