Alternative Funeral Service - Yr Eglwys yng Nghymru

Gwasanaethau Angladd
Pan fo’r arch yn ei lle, y mae’r gweinidog yn gweddïo gan ddefnyddio’r geiriau a ganlyn neu
eiriau addas eraill
Dduw ein Tad, trwy gyfodi Crist dy Fab dinistriaist rym marwolaeth ac agor inni’r ffordd i fywyd
tragwyddol. A ninnau’n cofio ger dy fron ein brawd/chwaer E., gofynnwn am dy gymorth i
bawb a ddaw ynghyd i’w g/choffáu. Dyro inni sicrwydd o’th bresenoldeb a’th ras, trwy’r Ysbryd
a roddaist inni; trwy Iesu Grist ein Harglwydd. Amen.
Gall aelodau o’r teulu, cyfeillion neu aelodau o’r gynulleidfa osod gorchudd dros yr arch, a
gellir defnyddio’r geiriau hyn:
Yr ydym eisoes yn blant Duw, ond ni ddatguddiwyd eto beth a fyddwn. Eto fe wyddom pan
ymddengys Crist y byddwn yn debyg iddo,oherwydd cawn ei weled fel y mae.
Neu
Ar Fynydd Seion fe symuda Duw y gorchudd o alar sy dros yr holl genhedloedd. Fe ddinistria
angau am byth, a sychu ymaith y dagrau oddi ar bob wyneb.
Gellir gosod Beibl ar yr arch, a gellir defnyddio’r geiriau hyn:
O Arglwydd Iesu Grist, dwg dy air bywiol ac anfarwol ni i enedigaeth newydd. Hysbyswyd yn
y Beibl dy addewidion tragwyddol i ni ac i E.
Gellir gosod croes ar yr arch, a gellir defnyddio’r geiriau hyn:
O Arglwydd Iesu Grist, o gariad at E. ac at bob un ohonom dygaist ein pechodau ar y groes.
DARLLENIADAU A GWEDDÏAU
Dad nefol, fe’n gwnaethost nid i dywyllwch a marwolaeth, ond i fyw gyda thi am byth. Hebot
nid oes gennym ddim i obeithio amdano; gyda thi, nid oes gennym ddim i’w ofni. Llefara
wrthym yn awr eiriau dy fywyd tragwyddol. Cyfod ni o boen meddwl ac euogrwydd i oleuni a
thangnefedd dy bresenoldeb, a gosod ogoniant dy gariad o’n blaen; trwy Iesu Grist ein
Harglwydd.
Amen.
Gellir darllen Ioan 14.1-6 neu ddarlleniadau addas eraill, gyda salmau a gweddïau a
distawrwydd.
Hollalluog Dduw, yr wyt yn caru pob peth a wnaethost ac yn ein barnu â thrugaredd a
chyfiawnder diderfyn. Llawenhawn yn dy addewidion o faddeuant a llawenydd a thangnefedd
i bawb sy’n dy garu. Yn dy drugaredd tro dywyllwch marwolaeth yn wawr bywyd newydd a
galar y gwahanu yn llawenydd y nefoedd; trwy ein Hiachawdwr Iesu Grist, a fu farw ac a
gyfododd drachefn ac sy’n byw byth mwy. Amen.
Tudalen 28