Alternative Funeral Service - Yr Eglwys yng Nghymru

Gwasanaethau Angladd
I’w defnyddio ar ôl Salm 32:
Arglwydd, ein cysgod mewn cyfyngder,
dygi ein heuogrwydd i gof.
Y mae dy law yn drwm arnom;
y mae ein tafodau yn sych
ac yr ydym yn cyffesu yn agored ein heuogrwydd.
Cofleidia ni â’th drugaredd.
Dysg ni i ymddiried ynot,
a dwg ni yn y diwedd
i lawenhau yn dy wyddfod am byth. Amen.
I’w defnyddio ar ôl Salm 38:
Arglwydd, trugarha
wrth y rhai sy’n galaru drwy’r dydd,
y rhai a barlyswyd ac a lethwyd gan ofid
ac a lanwyd â phoen trallod,
y mae eu nerth yn darfod
a’u cyfeillion a’u cymdogion wedi pellhau.
Gwyddost ti am ein holl ocheneidiau a dyheadau:
bydd yn agos atom a dysg ni i obeithio ynot ti;
trwy Iesu Grist ein Harglwydd. Amen.
I’w defnyddio ar ôl Salm 39:
Arglwydd Iesu Grist, Fab y Duw byw,
caniatâ inni dy geisio byth
ac ymborthi arnat gydol ein dyddiau,
canys yr wyt ti ym mhopeth
gyda phopeth a thrwy bopeth,
yn awr a hyd byth. Amen.
I’w defnyddio ar ôl Salm 90:
Dysg ni, Arglwydd, i gyfrif ein dyddiau;
i weld rhychwant ein heinioes yng ngoleuni tragwyddoldeb.
Datguddia inni dy ysblander.
Dyro inni ddoethineb a gras i adnabod dy gariad
ac i ymlawenhau yn dy faddeuant a’th fywyd;
trwy Iesu Grist ein Harglwydd. Amen.
I’w defnyddio ar ôl Salm 116:
Arglwydd bywyd,
yr ydym yn rhodio trwy dragwyddoldeb yn dy ŵydd.
Arglwydd marwolaeth,
yr ydym yn galw arnat mewn gofid a galar:
ac yr wyt yn ein clywed ac yn ein hachub.
Gwylia drosom wrth inni alaru am farw dy was/wasanaethferch,
a oedd yn werthfawr yn dy olwg,
a chadw ni’n ffyddlon i’n haddunedau i ti. Amen.
Tudalen 74