Alternative Funeral Service - Yr Eglwys yng Nghymru

Gwasanaethau Angladd
MEWN GOFID, EUOGRWYDD AC EDIFEIRWCH
44.
Dduw maddeugar,
yn wyneb angau darganfyddwn
gynifer o bethau sydd eto heb eu gwneud,
ac y gellid bod wedi eu gwneud.
Achub gam ein methiannau.
Rhwyma glwyfau camgymeriadau’r gorffennol.
Trawsffurfia ein heuogrwydd yn gariad gweithredol
a thrwy dy faddeuant iachâ ni.
Gofynnwn hyn yn enw Iesu. Amen.
GWEDDIAU AM BARODRWYDD I FYW YNG NGOLEUNI TRAGWYDDOLDEB
45.
O Arglwydd, cynnal ni
trwy gydol dydd ein bywyd blin,
hyd onid estynno’r cysgodion a dyfod yr hwyr,
distewi o ddwndwr byd,
tawelu o dwymyn bywyd
a gorffen ein gwaith.
Yna, Arglwydd, yn dy drugaredd dyro inni breswylfa ddiogel,
gorffwysfa sanctaidd a thangnefedd yn y diwedd;
trwy Grist ein Harglwydd. Amen.
46.
Dyro inni, Arglwydd,
ddoethineb a gras
i iawn ddefnyddio’r amser sy’n weddill inni ar y ddaear.
Tywys ni i edifarhau am ein pechodau,
am y drwg a wnaethom
a’r da nas gwnaethom;
a nertha ni i ddilyn yn ôl traed dy Fab,
ar y ffordd sy’n arwain i gyflawnder bywyd tragwyddol;
trwy Iesu Grist ein Harglwydd. Amen.
47.
Dduw ein Tad,
diolchwn iti am anfon dy Fab Iesu Grist
i farw drosom a chyfodi drachefn.
Cyhoedda ei groes nad oes derfyn i’th gariad;
cyhoedda ei atgyfodiad dranc angau, ein gelyn olaf.
Trwy ei fuddugoliaeth cawn sicrwydd
na chefni di arnom na’n gadael byth;
ac na all nac einioes nac angau,
na phethau presennol na phethau i ddyfod,
ein gwahanu ni oddi wrth dy gariad
yng Nghrist Iesu ein Harglwydd.Amen.
Tudalen 63