Alternative Funeral Service - Yr Eglwys yng Nghymru

Gwasanaethau Angladd
56.
Arglwydd Dduw tragwyddol, y mae pob enaid byw yn dy law:
llewyrcha, gweddïwn arnat,
ar dy Eglwys gyfan, ym mharadwys ac ar y ddaear,
belydrau disglair dy oleuni a’th ddiddanwch nefol;
a chaniatâ fod i ni,
gan ddilyn esiampl dda
y rhai a’th garodd ac a’th wasanaethodd yma
ac sy’n awr yn gorffwyso,
ddyfod yn y diwedd gyda hwy
i gyflawnder dy lawenydd tragwyddol;
trwy Iesu Grist ein Harglwydd. Amen.
LITANÏAU A GWEDDÏAU YMATEBOL
57.
Mewn tangnefedd gweddïwn ar yr Arglwydd.
Iesu, fara o’r nef,
yr wyt yn llenwi’r newynog â phethau da:
dyro inni ran gyda phawb o’r ffyddloniaid ymadawedig
yng ngwledd dy deyrnas.
Clyw ni, Arglwydd atgyfodedig,
ein hatgyfodiad a’n bywyd.
Iesu, goleuni’r byd,
rhoddaist i’r dyn a anwyd yn ddall y rhodd o olwg
ac agoraist lygaid ei ffydd :
dwg bawb sydd mewn tywyllwch i oleuni dy ogoniant tragwyddol.
Clyw ni, Arglwydd atgyfodedig,
ein hatgyfodiad a’n bywyd.
Iesu, Fab y Duw byw,
gwysiaist dy ffrind Lasarus o farwolaeth i fywyd:
cyfod ni yn y diwedd i lawnder tragwyddol bywyd dy atgyfodiad.
Clyw ni, Arglwydd atgyfodedig,
ein hatgyfodiad a’n bywyd.
Iesu, Iachawdwr croeshoeliedig,
wrth farw ymddiriedaist y naill i’r llall
Fair dy fam ac Ioan y disgybl annwyl:
cynnal a diddana bawb sy’n galaru.
Clyw ni, Arglwydd atgyfodedig,
ein hatgyfodiad a’n bywyd.
Iesu, ein ffordd a’n gwirionedd a’n bywyd,
dygaist dy ddisgybl Thomas o amheuaeth i ffydd:
datguddia ffydd yr atgyfodiad i’r rhai sy’n amau ac sydd ar goll.
Clyw ni, Arglwydd atgyfodedig,
ein hatgyfodiad a’n bywyd.
Tudalen 66