Alternative Funeral Service - Yr Eglwys yng Nghymru

Gwasanaethau Angladd
4. NUNC DIMITTIS
Pan fyddom yn effro, boed inni wylio gyda Christ:
pan fyddom ynghwsg, boed inni orffwys mewn tangnefedd.
1 Yn awr yr wyt yn gollwng dy was yn rhydd, O Arglwydd:
mewn tangnefedd yn unol â’th air;
2 Oherwydd y mae fy llygaid wedi gweld dy iachawdwriaeth:
a ddarperaist yng ngŵydd yr holl bobloedd:
3 Goleuni i fod yn ddatguddiad i’r Cenhedloedd
ac yn ogoniant i’th bobl Israel.
Luc 2.29-32
Gogoniant i’r Tad ac i’r Mab ac i’r Ysbryd Glân:
megis yr oedd yn y dechrau y mae yn awr,
ac y bydd yn wastad, yn oes oesoedd. Amen.
5. CÂN Y RHAI A GYFIAWNHAWYD
Oherwydd ein bod wedi ein cyfiawnhau trwy ffydd:
y mae gennym heddwch â Duw trwy ein Harglwydd Iesu Grist.
1 Y mae cyfiawnder i’w gyfrif i ni, sydd â ffydd gennym:
yn yr hwn a gyfododd Iesu ein Harglwydd oddi wrth y meirw.
2 Cafodd ef ei draddodi i farwolaeth am ein camweddau:
a’i gyfodi i’n cyfiawnhau ni.
3 Am hynny, oherwydd ein bod wedi ein cyfiawnhau trwy ffydd:
y mae gennym heddwch â Duw trwy ein Harglwydd Iesu Grist.
4 Trwyddo ef, yn wir, cawsom ffordd, trwy ffydd:
i ddod i’r gras hwn yr ydym yn sefyll ynddo.
5 Yr ydym hefyd yn gorfoleddu yn y gobaith:
y cawn gyfranogi yng ngogoniant Duw.
6 Yr ydym hyd yn oed yn gorfoleddu yn ein gorthrymderau:
oherwydd fe wyddom mai o orthrymder y daw’r gallu i ymddál,
7 Ac o’r gallu i ymddál y daw rhuddin cymeriad:
ac o gymeriad y daw gobaith.
8 A dyma obaith na chawn ein siomi ganddo:
oherwydd y mae cariad Duw wedi ei dywallt yn ein calonnau
trwy’r Ysbryd Glân y mae ef wedi ei roi i ni.
8 Ond prawf Duw o’r cariad sydd ganddo tuag atom ni:
yw bod Crist wedi marw drosom pan oeddem yn dal yn bechaduriaid.
9 A ninnau yn awr wedi ein cyfiawnhau trwy ei waed ef:
y mae’n sicrach fyth y cawn ein hachub trwyddo ef rhag y digofaint.
10 Ond heblaw hynny, yr ydym hefyd yn gorfoleddu yn Nuw
trwy ein Harglwydd Iesu Grist:
trwyddo ef yr ydym yn awr wedi derbyn y cymod.
Rhufeiniaid 4.24,25; 5.1-5,8,9,11
Gogoniant i’r Tad ac i’r Mab ac i’r Ysbryd Glân:
megis yr oedd yn y dechrau y mae yn awr,
ac y bydd yn wastad, yn oes oesoedd. Amen.
Tudalen 79