Alternative Funeral Service - Yr Eglwys yng Nghymru

Gwasanaethau Angladd
52.
Dwg ni, O Arglwydd ein Duw, yn ein deffro olaf,
at dŷ a phorth y nefoedd,
i fynd drwy’r porth hwnnw a byw yn y tŷ
lle nad oes na thywyllwch na gor-ddisgleirdeb
ond un goleuni di-dor;
dim sŵn na distawrwydd,
ond un miwsig di-dor;
dim ofnau na gobeithion,
ond un meddiant di-dor;
dim diwedd na dechrau,
ond un tragwyddoldeb di-dor;
yn nhrigfannau dy ogoniant a’th arglwyddiaeth
byth heb ddiwedd. Amen.
53.
Dad annwyl pob bywyd,
fe’n lluniaist i ti dy hunan,
a diorffwys ein calonnau nes gorffwysant ynot ti.
Caniatâ inni yn y fath fodd dy garu a’th wasanaethu,
a byw bob dydd er dy fwyn,
fel y caffom, yn y diwedd,
estyn atat a gwybod y cerir ni,
agor ein calonnau iti a gwybod y maddeuir inni;
ac, wedi ein caru a’n derbyn felly, orffwyso ynot;
trwy gariad ein Hiachawdwr Iesu Grist. Amen.
54.
Dduw tragwyddol,
yr wyt yn rhoi goleuni i’r rhai sy’n eistedd mewn tywyllwch
a chysgod angau;
llewyrched dy oleuni ar y rhai sy’n galaru
fel y llawenychont yn dy ddiddanwch bendigaid
a byw yng ngoleuni atgyfodiad
Iesu Grist ein Harglwydd. Amen.
55.
Dad pawb oll,
yr erys dy saint,
trwy dy drugaredd a’th ras,
mewn goleuni a thangnefedd tragwyddol:
cofiwn yn ddiolchgar
am y rhai hynny a garwn ond nas gwelwn mwyach;
a gweddïwn ar i’th berffaith ewyllys di
gael ei chyflawni ynddynt;
trwy Iesu Grist ein Harglwydd. Amen.
Tudalen 65