Matchzytig / Matchprogramm Zusammenfassung 2019720 - Vorrunde 2023/24

Dr Pächvogu vor Wuche
Im Schpiu gäge SC Worb, es louft die 89. Minute und es schteit
2:2, foulet e Worber dr Marco Kocher u schteit ihm pär
Exgüsse no uf's'Chnöi. Dä arm Cheib het päägget wie ne
Moore und blybt ligge. Nenei, müed isch är nid gsy und
nümme möge geit bim Marco scho grad gar nid, bygoscht
nei! We dä blybt ligge, de muesch nid grad am Lycheschmuggler
aalüte, aber de isch beschtimmt öppis
gröbers passiert. Das het dr Marco vo sym Vater, dä isch
aube no uf eim Scheiche schnäuer gsy aus si Gägeschpieler,
u wenn's de gar nümme gange isch, de isch är haut uf de
Chnöi wyter und het probiert ne no z'packe. Item, wieder
obe aachnüpfe. Auso dr Marco liggt am Bode u dä vo Worb
was gisch was hesch uf ds Büregou zuegsecklet und nächhär
macht dä fräch Cheib no ds zwöi zu drü.
Do fäut doch e wichtige Protagonischt? Genau, dr Schiri! Nei, dä isch nid hingerem Damm go es
Gschäftli verrichte, dä isch uf em Bitz umegfurzet und het versuecht, aues was y churzer Zyt passiert
isch, is Fadechörbli z'tische. Und nei – unmüglech es Foul – es isch jo nume z'vordere Chrüzband
grisse. Wenns Foul wär gsy, de wär z'hingere Chrüzband, z'üssere Syteband, z'innere Syteband,
z'Hoseband, z'Armband und z'Schtrumpfband ou abenang. Aber äbe, "nume" z'vordere
Chrüzband, wägerli isch doch ke Pfiff wärt. Das isch jitz e Löu, so eine.
Ds Gou het zeut, dr Marco isch gäng no gläge, d'Worber (die fräche Cheibe) hei gjublet, mir sy
schier düredrähjit, eine uf em Bänkli het e Trinkfläsche verjätet, ir Buvette isch ds Bier i de Häus
blybe stecke, ds Würschtli vom Hotdog
isch wieder is Brot zrugg. Churz
u bündig – e Schysstag.
Donnschtig, 7. April 2022, dr Marco
git d'Schademäudig düre. Z'vordere
Chrüzband isch grisse, chönnt sy,
dass no öppis derzuechunnt. Das
heisst operiere, dr Termin isch ou
scho gnaglet.
Die wärde Fröid ha ir Bude und uf
de Bouschteue.
Dr André Habegger hets am ne
Fründschaftsschpiu vom Zwöi ou
verwütscht. So viu ig ghört ha,
gseht's no chley schlimmer us.
Mir wünsche am Marco und am André gueti und schnäui Besserig!
135