Matchzytig / Matchprogramm Zusammenfassung 2019720 - Vorrunde 2023/24

Neue Saison, neue Liga, neues Glück?
So hei mir ir letschte Usgab über e Schtart vo dr nöie Saison brichtet. Vorläufig chame dä Negativtatsch
(zur augemeine Verständigung. Negativtouch) y Form vom ne Frogezeiche eliminiere,
wüu, und das isch sehr erfröilech und erwärmt üses FCB-Härz, dr FCB nach drüü Schpiu sapperlott
scho nüün Punkt het. Aber aues schön dr Reihe no.
Mir hei uf dr Homepage nach zwöi Schpiu es Resümee zoge und unger angerem zersch dr Trainer
chley y d'Hüpple gno. Ig zitiere: "…zmittsdrinn dr Slobodan Pranjic. E ruhige und besonnene Maa,
mit em ne ganz guete Droht zu syne Jungs. Engagiert, energisch,
ziuorientiert! Mit syre positive Dänkwiis überchunnt me ds Gfüu,
dä Maa cha Bärge versetze."
Das isch ou ds Täuffelen nid angers gsy. Sy ufgschteuti Art und ds
positive Dänke schwappe übere zu de Schpieler. U so gö sie as
Wärch. Fokussiert, jede weiss ganz genau was är muess mache und
kennt ou d'Ufgabe vo de Näbelüt. Däm seit me es Kollektiv und das
sy mir wieder. Und das färbt sich uf d'Leischtig ab. U schnurre,
Giele schnurre müesst dir mitenang. Är seits nid so, aber är seits,
dass es jede verschteit. Mängisch vergässe sie's, aber de isch dr
Slobodan wieder do und git ne es Stüpfli.
Was mi a ihm unheimlech überzügt isch, dass är seit: "Ig nime nid
14 oder meh Maa mit und lose uf em Bänkli lo schmore. Öb jitz dä
sächzähni isch oder vierzgi. Schpiut ke Roue, gebührend zum Ysatz cho muess er. U de nimmt me
haut mou e arrivierte Schpieler y dr Pouse use und bringt e junge hungrige Sächzähjährige, wo sy
Leischtig bringt, wüu är ds Vertroue gschpürt. Das isch hohe Kunscht, so muess es sy.
Mir verzeue jitz glych no, was in Töiffele abgange isch. Das dr FCB 6:1 gwunne het, isch gloub by
aune düre. Büre het dä Matsch y d'Häng gno, wie sie bis jitz jede y d'Häng gno hei. Vo Aafang a
derby und vou konzentriert. Uf ne schön zirklete Corner vom Fabian Schuler (20. Min.) schtiegt
dr Thomas Lerch (är isch aus hängendi Schpitze ufgschteut gsy!) am höchschte und nickt höch y.
Ke Minute schpöter erhöht dr Fabian Schueler uf 2:0. Mit däm Resultat isch me i Pouse. Eigentlech
hät's chönne 4 oder 5 zu 0 schtoh. Aber wichtig isch, wenn me zur Kabine usechunnt, dass
me dört wyterfahrt wo me ufghört het. 53. Minute, dr Nick Eggenberger wird gfoulet und är verwandlet
dä Penauti mit Schmackes grad säuber. Wieder knapp e Minute düre, isch dr Nick scho
wieder dr Houptdarschteuer, 4:0. E Unachtsamkeit ir Büreverteidigung bringt Töiffele mit em ne
Gou us absytsverdächtiger Position y Euphorie. Bau wär ds 4:2 gfaue, aber dr Schtürmer isch sich
säuber im Wäg gschtange. 85. Minute, jo genau, scho wieder dr "Men of the Match" Nick Eggenberger
macht ds 5:1.Das dr Dario Leisi ou no zu sym Gou cho isch, het ihm jede möge gönne und
es isch eigentlich ou logisch gsy. Grackeret und gringsvoraa y Zwöikämpf, u gäng dört wos ungmüetlech
isch. Eifach im Abschluss het's bis zur 87. Minute nid wöue klappe.
Heilandsack, jitz schtöh mir a dr Schpitze, hey es konfortabus Gouverhäutnis und mygottseeu es
Punktekonto, wies im Büechli schteit. Doch nid so schlächt, zwüschyne i d'Viertliga go Fröid am
Fuessbau und neue Pfupf hole! Hopp FCB
217