Matchzytig / Matchprogramm Zusammenfassung 2019720 - Vorrunde 2023/24

HERZLICH WILLKOMMEN AUF DEM LACHEN
Die zwöiti Usgab vom Matschblatt isch gäge Azzurri Biel erschiene. A dä Sunntig isch
üsid'Erinnerig zwieschpäutig, het doch e bluetlääri Leischtig vo üser Mannschaft zum ne 5:1
Debaku gfüehrt. D'Wuche druf uf dr Linde ds Biu isch definitv Wiederguetmachig agseit gsi.
Usgrächnet gäge Aurore, e Verein wo ir Vergangeheit mehrheitlech ir 2. Liga gschuttet het u uf
em Platz Biu cha i Pärsonausache us em Voue schöpfe. Es isch du ou zum erwartete
Abnützigskampf worde. Het Aurore die erschti Haubzy liecht dominierend gschtautet u isch
früeh dür ne Händsfreischtoss vom Sächzähner i Füerig gange, het Büre ir zwöite Häufti Gas gäh
und schpät d'Entscheidig erzwunge. Ir 81. Minute het dr Fabian Schuler dr Usglich dür ne
schlitzohrige Heber über dä Zwöimetermaa im Gou vo Aurore gschafft. D'Entschtehig vom 2:1 für
Büre näh mir us em Matschbricht: "Mittlerwyle isch dr Zeiger vo dr Matschuhr scho uf die 90.
Minute gumpet. Mir müesse üs äuä mit däm Punkt – super – die Agriffsuslösig vom Thomas
Lerch i Louf vom Joel Tüscher u dä gseht dr Manuel Scheidegger uf dr änere Syte, läck mir dä
Sytewächsu isch Wäutklass, oohhh was macht dr Manuel Scheidegger, loht e Gägner lo usschtige
u – Gouuuu, tschou zäme. Geniau gmacht, tüpisch Mänu, furztroche i läng Egge versteckt". Sie
hei du die räschtlichi Zyt no souverän z'Änd brocht und verdient die erschte drü Punkt heibrocht.
Hüt begrüesse mir üsi Nachbare us Rüti uf em Lache. Mi isch nid nume geografisch Nachbare, nei
ou i dr Tabäue schteit me iträchtig uf em zähte und eufte Platz näbenang, mit jeweils drü Punkt
us vier Schpiu. Für beid Egippe sicher unger ihrem Aschpruch. Us dere Sichtwys chöi mir üs sicher
uf nes hert umkämpfts Schpiu fröie, wo dr Usgang z'tippe nid ganz eifach isch. Bsunders ou, wüu
a däm Schpiutag dr FCB muess wäge Ferieabwäseheiten uf öppe 6 – 8 Schpieler verzichte. Do
chame nume säge, gottlob hets uf die Saison e scho lang nümme feschtgschteute Zuewachs a
junge und erfougsverschprächende Schpieler gäh. Jitz isch me nid grad mit em Füdle am Haag u
muess mit em Schicksau hadere.
Es isch so sicher wie z'Amen i dr Chiuche, es wird es schpeziells Schpiu wärde, wie immer wenns
heisst – Büre gäge Rüti!
Hopp FCB!
Zur Pfleg vo Sportverletzige muesch nid wyt seckle, im
Schtedtli z'Büre chasch aues ha!
17