Matchzytig / Matchprogramm Zusammenfassung 2019720 - Vorrunde 2023/24

Spielerportrait. Yannic Kubacki
Yannic Kubacki, oder churz eifach "Kubi", het am 19. Oktober 2000 aus Waage-Maa ds Liecht vo dr Wäut
erblickt. Hut isch är e stattleche Maa mit brune Ouge, 176 cm Grösse und em ne Gwicht vo 80 Kilo. Jo
mygottseeu e robuschte Bursch, gschaffe für im Schturm z'schutte. Meischtens isch är nid uf dr Wunschposition
"Mittuschtürmer" ungerwägs, sondern chunnt über's Couloir (Aussenbahn, eine gedachte Fläche
entlang der beiden Seitenauslinien) und isch für die perfekte Flangge zueschtändig. Schnäu und Zwöikampfstarch
isch dr Kubi, aber über z'Syte z'cho isch nid ganz sys Ding. Wär gschpannt uf paar Ysätz i dr
Schpitze. Dr Waage-Maa isch usgwoge, usglychend, scharmant, diplomatisch, ehrlech, grächt. Es
hört fasch nümme uf mit positive Eigeschafte. Aber är isch ou unentschlosse, e liebe Cheib und
seit am Friede z'lieb nüt und hocket uf's Muu. Biss, frächer sy, übere Schatte schpringe und chley
meh Säubschtvertrou das fäut üsem Power-Maa. Aber was nid isch, cha jo no wärde.
Bei het dr Kubi dr Arthur Cabral (Schtier) und Zlatan Ibrahimovic (Waage, erschtunlech)
und dr FC Basel aakrüzlet. Burger und Schnitzu und e Apfelschorle und dr Kubi isch hin und
wäg. Bi dr Musig leit är sich nid fescht und seit ganz eifach aues. Bi dr Frog nach de Sterchi
tuet är z'Häneli zue und lot sich mit "einige" nid uf d'Escht use. Mir bohre nid wyter und froge nach de
schwache Syte, was mit verlüüre beantwortet wird.
Dr Schofför mit em Hobby Fuessbau, synerzyt über e SV Lyss und FC Diessbach zu Büre cho, seit zum Rituau
vor em Schpiu"zerscht dr lingg Schueh und nächhär dr rächt Schueh aalege", de schtimmts für ihn. A
Büre ma är bsunders, typisch Kubi typisch Waag, "aues"!
Die gröschti chlyni Fröid vom Autag isch für ihn z'entschpanne nach em ne herte, arbeitsryche Tag. Schön
chöi mir uf di aus Kolleg und Teammitglied zeue Kubi!
189