Matchzytig / Matchprogramm Zusammenfassung 2019720 - Vorrunde 2023/24

Spielerportrait: Men Meier
Vo Büren über Wacker Grenchen, FC Solothurn, FC Grenchen, hets ihn im Summer 2019 wieder zrugg zu
de Wurzle zoge. E eijährige Abstächer i d'USA (Studiumsufenthaut) het är gnützt, um bi CESA (Carolina
Elite Soccer Academy) und Greenville Red Raiders am Bau z'blybe. Är schpiut uf sir Lieblingsposition, em
Zäntrale Mittufäud.
Am 9. Mai 2001 gebore, isch am Men dr Fuessbau i d'Wiege gleit worde. Wie der Vater so der Sohn, chame
säge. Vo Wacker Grenchen cho, isch sy Vater Patrick 2006/07 bis 2007/08 bim FCB erfougrich uf Torjagd
gange. Mit syne 184 cm und 77 kg isch dr Men für ds Mittufäud dr perfekt Maa. E starche rächte Fuess, mit
em lingge het ärs nid so ganz am Huet, und e guets Chopfbauschpiu zeichne ihn us. Wenn är zu eim vo syne
Rushes aazieht, isch är chum z'brämse. Das si Wärte wo mir i de letschte Schpiu, wäg em ne Fingerbruch
und er e notwändige Operation, leider hei druf müesse verzichte.
Froue, dr Schtudänt der BWL (ab Herbscht 2022) und Fuessbaufan Men mit syne brune Ouge
und em Wuschuchopf, isch leider scho vergäh. Är reiset gärn, Pizza isch sys Lieblingsässe und
"dr Pepper" isch z'bevorzugte Getränk. Bir Frog nach em Lieblingsfuessbauer chunnt wie us dr Pischtole
gschosse – Mohamed Salah. Dass do derby näbscht YB no Liverpool unger uftouchet erschtunt nid.
Dr Men isch vo dr schtiuere Sorte, isch ke lute, macht keni Gabriole und schteut sich nid i Vordergrund.
Typischi Eigeschafte vom Stier sy wertebewusst, authentisch, geniesserisch, treu. Ds Motto "in der Ruhe
liegt die Kraft" passt zu ihm. Sympathisch und ruhig chunnt är übere, e pflegeliechte äbe. Froge mer de bi
Glägeheit sini Eutere oder sy zwöi Johr jüngeri Schwöschter Staschia.
Schön bisch bi üs Men!
178