Matchzytig / Matchprogramm Zusammenfassung 2019720 - Vorrunde 2023/24

Sache gits, die gits gar nid
Tatort: Sportplatz Lachen, Büren an der Aare
Datum und Anlass: Samstag, 14. Mai 2022, Spiel der 3. Liga FCB gegen den FC Lengnau
Wie üeblech go ig nach em ne Matschwuchenänd über z'ganze Gländ go luege, öb aues
in Ordnig isch. Do es Fötzeli, dört es Gütterli, hie und do und überau Zigarettestummle
(die bringe mi zur Wyssgluet), die verd..... Snusbriefli chöme ou no drzue (do bi ig de churz
vor dr Explosion, do drzue schpöter meh). Nid düredräie, eifach ufläse, entsorge und guet
isch.
Jää - aber haut – heitere Fahne was isch de das? Het öpper a mi dänkt und es Präsäntli häregleit?
Es isch zwar nid mit em ne schmucke Bändeli zämebunge, het drfür aber e härzigi Schloufe, es
Chärtli isch ou nid derby. Was chönnt do drinne schtecke? E japanische Glückskeks, suuri Täfeli
oder gar Nydletäfeli, emänt es feins Praline vom Maître Chocolatier, wo jedes Praline vo Hand
füut? Das wär dr Hammer. Ds Wasser louft mir jitz scho im Muu zäme. Jää aber es bruns Seckli,
das isch nid grad z'gäube vom Ei. Chley innovativer hät dä Schpänder ou chönne sy. Henusode, wählerisch
darf me weiss Gott nid tue, weme scho beschänkt wird.
Wo ig du nöcher cho bi, isch mir es Lichtli ufgange. Ig ha nid überbysse, es isch mir ou nid obsi cho. Dr erscht
Gedanke isch gsy, hey doch tatsächlich d'Längnouer dr Fiduz gha, drüü Punkt us Büre z'entfüehre
und dr Schyssdräck ou no grad do z'lo. Ig ha während em Matsch die Frou mit däm wullige Hundeli scho
gseh und ha no dänkt, "wenn de das chlyne Cheibli muess, landet de das Gschäft im Handtäschli? Es isch
du definitiv nid so cho, wüu mir jo ke Robidog chöi biete. Ig bi der Frou nid bös, sie het die zwöitbeschti
Variante usgläse und das ominöse Ding so platziert, dass mir für e sachgerächty Entsorgig verantwortlech
sy. Vo däm här, e Gruess a ds Frouchen und ihrem Hundeli. Ig cha villech no e Tipp mit uf e Wäg gäh:
"Das nächste Mal wird ausgeschissen angetreten oder e Windle montiert, giut für ds Hundeli nid für's
Froueli !"
Jitz möcht ig no gärn de Snuser öppis mit uf e Wäg gäh
Liebe Snuser, dieser Oraltabak beinhaltet 28 krebserregende Stoffe. Bei Schwangeren kann der Gebrauch
zu Fehlgeburten führen.
Ein weggeworfenes Säckchen beinhaltet immer noch genug Stoffe, um bei einem Kleinkind Schäden hervorzurufen.
Was schliessen wir daraus? Die Dinger gehören in den Abfall nicht auf den Boden! Danke!
181