Matchzytig / Matchprogramm Zusammenfassung 2019720 - Vorrunde 2023/24

Neues Ehrenmitglied Thomas Lauper
Thomas Lauper, 17. Februar 1970
A dr 86. Generauversammlig vo letschter Wuche isch am
Thomas Lauper d'Ehremitgliedschaft verliehe worde. Zu
dere verdiente Wau gratuliert die ganzi FCB-Familie ganz
härzlech.
Sit Chindesbei isch dr Thömu e waschächte und liideschaftleche
FCBler. Öb uf em Bitz, hinger dr Theke, mit Biku u
Schufle oder deheim am Kompi. Immer a vorderschter
Front, mit Rat und Tat präsänt. E Riesser und e Macher.
D'Projekt wo unger sine Fittiche vor Idee, über d'Planig
bis zur Umsetzig gwachse sy, chasch fasch nümme ufzeue. U wenn dr Thömu
mou nid fäderfüehrend aktiv isch gsy, hesch uf ihn chönne zeue.
Im ne Portrait hei mir gschriebe: Bsunne und ruhig, bodeschtändig u witzig,
paart mit ere schtarche Meinig. Adjektiv wo uf üse Thömu träffend passe.
Passe tuet ou, dass är e perfekte Papi und e liebenswärte Kolleg isch, wo e
gwüsse Schalk und am rächte Ort e passende Schpruch nid cha verlügne.
Mit em Name Lauper chunnt am ne FCB-Mitglied schpontan mou ds Schutte i
Sinn. Chrigu – Thömu – Luca! Aui drü begnadeti Fuessbauer und zu de
Aktivzyte begährti Manne uf de Zedle vo de umliegende Vereine. Die Drei hei
aber no angeri Gmeinsamkeite, Tröii zum Verein. Fasch usnahmslos, es paar
Abschtächer i de Juniorezyte, hei aui z'Büre Karriere agfange und ou beändet.
E wyteri Gmeinsamkeit isch ds Angaschement für e Verein, sig das für's
aapacke oder i dr Teppichetasche für ds Gschick vom Klub z'leite. Arbeit vo
drei Generatione vo unschätzbarem Wärt.
Thömu, du u dini Familie hei für üse Härzensverein Bärge versetzt,
Unmüglechs müglech gmacht, Böim lo i Himmu ufe wachse und das immer mit
Reschpäkt und Scharm de angere gägenüber. Das zeichnet di us! Chapeau
Thömu!
Mir danke dir und dir Familie vo Härze!
207