Matchzytig / Matchprogramm Zusammenfassung 2019720 - Vorrunde 2023/24

Patrick "Vofi" Von Felten
Wär dr Vofi mou het gseh schutte, isch dr Idruck nid los worde, dass dä Maa bir Geburt bereits
Schuttschueh het agha. Schnäu wie ne Pfyu, trickrich, schlitzohrig und mit em ne satte Schuss
usgstattet isch är für jede Gägespieler zum Trauma worde.
Mit sächs Johr isch dr Vofi bim FC Dotzigen i sy Karriere gstartet u schnäu isch klar worde, dass
me das Talänt nid lang cha haute. Bereits mit 13 (1994) het är zum FC Biel gwächslet und isch
über d'U-16 und U-18 i dr 1. Liga zum Stammspieler worde.
Im Summer 2006 het sich d'Frog gsteut, Fuessbau verbunde mit viu Ufwand
oder Bruef, zum Glück für e FC Büre het ds Zwöite dr Usschlag gäh. Vom FC Biel
und vo dr Badi het me sech kennt und so het är u si Kolleg Michael Blaser sich
für üse FCB entschiede. Legendär isch am Vofi si Spruch alässlech vom ne
Interview mit em Bieler Tagblatt. "Ich will in Büren eine gute Zeit erleben".
Bereits ir erste Saison het me dr Ufstieg i die 1. Stärkeklass gschafft und i dr
Saison 2008/09 sogar dr Gump i die 2. Liga realisiert.
Uf d'Saison 2009/10 het sich dr Vofi a ne nöii Herusforderig gwagt und het in Dotzigen ds
Traineramt übernoh. Mir hei damaus gschriebe "Vofi – mönschlech wie sportlech e Mordstyp, du
wirsch üs schwär fähle! Merci für aues und viu Erfoug mit em FC Dotzige! Du weisch – Tür isch für
di immer offe!" Und die Iladig het dr Vofi uf d'Rückrunde 2017/18 agnoh und mit dem Patrick
Tüscher die 1. Mannschaft übernoh. Bereits e Saison spöter het är scho wieder chönne e Ufstieg
fiire (vor 4. i die 3. Liga). Mi chönnt fasch säge, es Feierbiest dä Vofi!
Die gueti Kameradschaft innerhalb vom Team und im ganze Verein hei dr Vofi bewoge, erneut zu
üs z'stosse. Hüt steit är im "Eis" am Reto Rüttimann zur Syte. Mit sire ruehige Art, em
fuessbauerische Wüsse und dr Kunst, es Spiu chönne z'läse, e unverzichtbare Maa, bsunders ou
wüu dr Reto aus Spieler uf em Platz unverzichtbar isch.
2008 het dr Vofi es nöis Kapitu i sym Läbe uftoh und isch mit sir Läbenspartnerin Rocio
zämezoge. Im März 2010 isch d'Elin uf d'Wäut cho und im Januar 2012 dr Stammhauter Noah. Dr
Vofi schaffet uf dr Versicherigsbranche bir Vaudoise Lyss aus Seniorberater Versicherig und
Vorsorg und wohnt in Lyss
"Ig hoffe ou jitz wieder e ähnlich erfougrichi Zyt
in Büre erläbe z'chönne. Z'Wichtigschte isch
jedoch, dass mir es kameradschaftlechs
Mitenang pflege u wyterhin Spass a üsem
Hobby hei."
Vofi, schön bisch bi üs u Spass hei mir mit dir in
Hülle und Fülle. Wär weiss, drü Mou mit Büre
ufgschtiege. Das cha wahrlech nid mänge vo
sich bhoupte.
Viu Glück u blib wie de bisch!
83