Matchzytig / Matchprogramm Zusammenfassung 2019720 - Vorrunde 2023/24

Willy Rüttimann – der Tausendsassa
Es git Lüt im Kreis vom FC Büren an der Aare, do chunnsch nid drum, i Gspräch
übere Verein die Näme z’erwähne. Eine dervo isch dr Willy Rüttimann. E
Tausendsassa steit im Titu u das seit übere Willy fei chlei viu us u triffts gloub
nid so schlächt. Fescht verwurzlet, i aune Ressort sattufescht, wenns muess sy
durchus e chlei unbequem und mit Nachdruck sy Standpunkt verteidigend. Und natürlech e
exzellänte Kenner vom regionale Fuessbau. Über das use e interessante und fesselnde Erzeuer, wo
die nötigi Priise Schalk und Spass nid darf fähle by syne Wort- und geischtriche Gschichte und
Anekdote. Churz gseit, eine wo me mah und gärn zu ihm a Tisch hocket u uf e nöchscht Gorps
wartet, wo me so härzhaft cha lache drüber. Är het scho chlei Kultstatus üse Willy, das chame mit
Fueg u Rächt scho im Rum so lo schtoh.
Gebore am 25. März 1955 in Grenchen, nächhär Schueu- und Jugendzyt in Lengnau. Nach dr Lehr aus
koufmännische Agsteute het är in Suhr by Möbel Pfister e wyteri Usbiudig aus Möbuverchöufer
absolviert. Nach diverse Wanderjohr by verschiedenste Arbeitgäber het ihn d’Liebi uf Büre
verschlage. Us dr Ehe mit dr Evi Sutter (d’Tochter vom Coiffeur Sutter) hei zwe Söhn (Reto und Mark)
und d’Tochter Anne ds Glück vo dr Familie vervouständigt.
Bereits 1976 isch dr Willy Aktivmitglied vom FCB worde und ab 1978 mit de erschte Ämter betrout
worde. Trainer bi de Juniore D und A und spöter die bi dr 2. Mannschaft und de Veterane. Nach 10
Johr im sportleche Berich het me z’Büre gmerkt, was dr Willy uf dr Pfanne het. Im Vorstand het är
d’Ämter vom Sekretär, Kassier, Sportleche Leiter, Vizepresidänt und Presidänt usgüebt. Dr Gluscht bi
angere Vereine z’gseh, wie’s die mache, het ihn zum FC Grenchen (Vizepresidänt, damaus no
Nationalliga A) und drufabe zum FC Lengnau aus Sportchef lo wächsle. Sy Troum, ds Hobby zum
Bruef z’mache het nid wöue klappe, so isch dr Willy z’Büre wieder mit offne Arme empfange worde.
Dr Usblick nach ere sichere Arbeitssteu het ihn i d’Wybranche verschlage, wo är aus
Regionalverchoufsleiter bis zur Pensionierig erfougrich gschäftet het.
Aus Sportchef, mit de Trainer Heider, Gisiger, Ramseier, Neuenschwander und Reinhart het dr Willy
meh oder minder e erfougrichi Zyt verbrocht und mit sine Trainer so mängge Kampf usgfochte und
ou mänggi Schlacht uf em Lache erfougrich gstautet. Är het aber ou stürmischi Zyte erläbt. Nach ere
hektische Phase isch dr Willy mit dr Wau vom ne nöie Vorstand aus Retter in letzter Not zum
Presidänt gwäut worde. Het du nächhär die undankbari Ufgab übernoh, dr Marlon Hodgson aus
Trainer z’entloh und dr Kurt Baumann aus dr Heilsbringer in Büre z’installiere. Uf si schönschti Zyt
agsproche, meint är d’Saison i dr zwöite Liga sig es bsunders Highlight gsi. Mit em Car mitz unger de
Fans is Oberland oder i Jura reise, das heig gfägt und mängge schöne und unvergässleche Momänt
brocht.
We me euter wird cha’s sy, dass eim Bräschte oder ungewollti Stresssituatione urplötzlech zum
gwohnte Umfäud usriesse. Do isch ou dr Willy nid verschont worde und het müesse chürzer träte.
Hüt isch är aber vou motiviert und vor Gsundheit strotzend wieder mitz im Tagesgschäft. Dr Willy
isch ab dere Saison im Vorstand, wo är mit viu Gschick u Gschpüri d’Marketingabteilig füehrt. Sys
Wort u sini organisatorische Fähigkeite sy im Vorstand ressortübergryfend gfrogt und geschetzt.
Willy mir sy gspannt, was bim nöchschte Mou bim Zämehocke für ne Mocke bringsch. Süffisant
verzeut, usgschmückt mit träffende Wort und so unnachahmlech und authentisch a Maa brocht,
dass es eim verriesst vor Lache. Solche Männer braucht das Land. Umgmünzt uf üse FCB «Mir si froh
Willy, riessisch wieder am Charre."
93