Matchzytig / Matchprogramm Zusammenfassung 2019720 - Vorrunde 2023/24

Üses Fischässe – e Erfougsstory – 2 -
Sepp Eigenmann, dr Lehrling Thomas Lauper und dr Willy Sutter
Do het sich dr Thömu dörfe von Lauper nenne. Das isch de e Ehr gsy, wenn zu dene ghört hesch,
wo hei dörfe Fisch mache und im Fau vom Thömu, de grad no so ne junge Schnuufer. Und
wichtig isch de no, wie me die Fisch tuet ufs Täuer püschele, das muess mit viu Liebi und
Begeischterig passiere. Dr Zitroneschnitz und e Schlargg Mayo ufs Täuer pflümle hingäge, das
dörfe de wieder fasch aui mache, wüu do ds Fyngfüeu nid so gfrogt isch. Aber potzwoumäu du
hesch zwe linggi Häng und chlatschisch e Schlirgge Mayo uf e Täuerrand. E böse Blick isch dir
sicher.
Ds Rezäpt
Dr Willy Sutter isch dr Vater vo dr Marinade und die Marinade isch heilig und wird ghüetet wie e
heilige Gral. Nach em viu z'früeche Tod vom Willy, isch ds Rezäpt a paar wenig Userwäuti
übergange. Gschmacksvou, e Gnuss im Muu und e sensationelle Abgang, so müesse d'Fisch sy. Bi
jedem Fischässe het me chönne vernäh: "Uh dir, das Johr sy de die Fisch schpeziell chüschtig, das
isch es Gedicht und haargenau richtig im Öu". Oder "Dir, säget emou, wo heit dir die feini
Marinade kouft?" "Jöö dir, sy die Fisch es Feschtässe." Das macht Fröid und mit der Zyt cha dr FC
uf so viu Schtammgescht zeue, dass me de öppe muess aaboue.
Am Frytig-Mittag geits zue wie im ne Beijihuus. Firme vo Büre lö sechs nid lo nä und chöme mit
de Aagschteute uf e Lachen cho Fisch ässe. Früschi Luft schnappe, e feine Fisch uf em Täuer,
villech es chlyses Schlückli Wysse (es isch jo eh de grad Fürobe), es Gaffe und e Crèmeschnitte
und ds Wuchenänd isch gebührend yglüte. E Guete!
Es ganz es härzlechs MERCI a üsi tröii Chundschaft!
306