Matchzytig / Matchprogramm Zusammenfassung 2019720 - Vorrunde 2023/24

92
Es Gspräch mit em Sportchef
Thomas Lauper, du hesch ab der Saison vom ne relativ sichere Presidäntestueu uf
ne Schlöidersitz gwächslet, was het di bisse, so es Manöver z'vouzieh?
Erschtens ha ig mis Soll i Sache Vorstand und Presidänt, wie akündet 8 Johr, erfüut.
Zwöitens muess me ou mou chönne los lo u ds Rueder de Junge chönne
übergää. Dr Wächsu zum Sportleche Leiter het sich eigentlech vo säuber ergäh
und teilwys ou dür Dränge vo Kenner vom FC Büre.
Nach em ne guete Start gäge Aegerten Brügg und Lecce het me 4 x verlore. Macht das di nid chlei
nervös, gramselets nid chlei unter dr Chopfhut?
Das mi das nid chüu lot isch gloub verständlech. Handcherum het d'Mannschaft gäge Aegerten
und Lecce guet gspiut und z'Potenzial abgrüeft, gäge Aurore het me e unglücklechi und unnötigi
Niederlag müesse istecke. Z'Spiu gäge Rüti darf me mit dene Chance nid verlüre und Orpund isch
um das eine Gou eifach besser gsi. Das verschobne Spiu gäge Azzurri wo me jitz uswärt het müesse
ustrage isch unger em ne ungünschtige Stärn gstange. Viu u wichtigi Usfäu, Ferieabwäseheite,
wo me haut nid het chönne plane wie gwünscht u villech ou ne chlei dr ungwohnt Platz.
Das aues het derzue bytreit, dass me dr Tritt nid gfunge het.. Chunnt derzue, dass zwöi Gou "unter
gütiger Mithilfe" ds Spiu beiflusst hei.
Mi het aber scho chlei e angeri Ziiuvorstellig gha, aus dä Platz knapp überem Strich?
Jo, das isch so. Aber wäge däm uf Panik mache würd dr Mannschaft nid grächt. Mir hei e gueti
Mischig vo Jung und Aut. Aui mache super mit und a mangelndem Trainingsfliess chöi mir üs nid
beklage. Chunnt derzue, dass Trainings ungerem Reto Rüttimann abwächsligsrich u ziiuorientiert
si. Z'Angaschema vom Trainerduo isch positiv und chunnt bir Mannschaft guet a. Ig bi zueversichtlech,
dass sech die Mannschaft uffoht, aber es brucht es gmeinsams Wöue und dr nötig
Kampfgeist u villech ou mou chlei Wettkampfglück.
Eis Thema isch jo brandheiss im FCB!
Du meinsch sicher dr Goalie!
Jo, jitz si mir so wyt, dass e 46-Jährige d'Nummer 1 isch, aber gäu richtig verschto, dr Michael
Sutter macht e grossartige Tschop, üsi Wärtschetzig isch ihm sicher.
Jo das isch so, ig rächne ihm das ou höch a. Das wird sicher i dr nöchschte Zyt es Thema sy.
Was möchtsch unbedingt no los wärde, respektive was muess gseit sy Thömu?
Mi Meinig isch, dass das Team und dr Staff nach wie vor üses Vertroue het und ou verdient. U
nid vergässe, bim FCB isch ds Publikum gäng e wichtige Faktor, es wird sy Teil ou derzue bytrage.
O wenn im Momänt d'Enttüschig vorherrscht, wärde mir a dere Egippe no Fröid ha.
Glich no es letschts Wort. Thömu, du bisch drfür bekannt ruhig und bsunne a öppis häre z'goh.
Wirsch du jitz chlei meh i Vordergrund trätte, i dr Kabine awäsend sy oder sogar am Match uf em
Bänkli hocke?
Was ig wenn wie mache wird vo Fau zu Fau entschiede. Ruehig blibe und Zueversicht usstrahle
bringt me, oder fuessbauerisch usdrückt "bhaute mir dr Bau flach!"