Fiabe bergamasche - Vittorio Volpi

l'ìa fač per podì iga qui pom; quela cagna de sò mader l'à fač parì de
es contéta a' le, ma scambe lé e 'l gigànt i n'à stödiàt söbèt ün'otra
per mandàl a l'óter mond. Ol gigànt al gh'ìa ü caàl che 'l copàa töč
quei ch'i völìa 'ndà sö; i à pensàt de dàglo ( 7 ) per fas portà a la çità
a fa i proisgiù. Quel fiöl xé mai bu, sae, al va sö e dopo poc pas ol
caàl al sa mèt a fa de mat, a trà di pešade, a ölì pià e a cór sö per di
prezzepézze. Quando l'à ést ixé: « Ah cara té, nó tó 'ö miga famla
a me », e con d'ü pögn söl nàs al l'à slongàt a tèra. Dré 'l va istès a
la çità, lö; e quando qui du i la 'èc a turnà coi sò proisgiù i à ölìt
crapà d' rabia. Nó i fa parì negót e i resta a' mò 'ntìs. I völ iddì do'
'l gh'à la forza. Öna séra la mader la 'l prega de 'ndà a dormì con lé;
la 'l fa caà fò e la gh' vèc i çentürì. Ol dé dré i ghe dà da bif bé;
quando l'è stač ciuc, i gh'à destacàt i çentürì e 'l s'i è metìč ol gigànt.
Dopo che 'l s'ì a üč metìč, al gh'à déč a quel póer fiöl: « Do' l'é-t' la
tò forza adès? T'é finìt adès ». E 'ntàt al la tira denàč a sò mader, ch'a
la gh' dis de copàl. Ol gigànt al ga 'ncaa fò i öč, al ga liga i ma de
dré a 'l l'à cašàt fò d ca con d'öna pešada 'n dol cül. L'ìa giràt assé
töt sdulurét fò per ü bosc quando 'l sét vergü; l'éra öna édva che la
faa 'mpó d legna. Sta fomna la l'à menàt a ca sò, do' gh'è stač ü bel
pèz. Laghémla gliò per ü momént intàt ch'a m' va a 'ddi de cóssa n'è
d la siura che i l'à deliberàt. Sta siura, dopo de ì speciàt a speciàt, l'à
credìt che 'l sò liberatùr al fös mòrt o che 'l l'aès abandunada; ü bel
de la gh' dis a so pader: « Tata, con / quela dóte che ölìef dam se m'
maridae, permetìm che fàbriche sö ün ospedàl ». Dopo che l'à üt fabricàt
l'ospedàl, l'à fač metì fò i carte che töč i 'nfirem e i orb i vegnés
a ricoerasga. La édva che la gh'ìa 'n ca 'l pòer orbo, la 'l ména a sto
ospedàl; l'è stač rizzeìt da la sò morusa, ma lé nó l'à miga conossìt.
Plö tarde i s'è conossìč, e le la gh' dis: « Vòi spusàf ». E lö, poarèt,
al ga respónd: « Nó 'l sarà mai déč; l'è a' trop se la m' té che ». « Tanté
vòi spusà »; la ciama sò pader, la ga dìs che quel l'è 'l liberatùr e
la l'ispusa prope. Ü dé che la l'menàa a spas in carozza, la 'ncuntra
öna siura col om orb a' lé. Menemà la 'èc che la l' ména a ü fontanì,
la gh' laa fò i öč e quel' ègua la gh'à turnàt la éstà. La fiöla dol re
l'à fač l'istès a' lé a 'l sò om l'è gnìt a 'ddiga. Dré ch'al gh'à üt la
ésta al völ indà a v'dì sò mader; al va braamente. Al troa 'l palàz
seràt fò e 'l vec a anzà gió da ü balcù i sò du çentürì, che sò mader
l'ìa metìt ilò per fai sügà perchè la g'ìa laàč. I a destaca gió, 'l s'i mèt
( 7 ) Segue una parola cancellata illeggibile.