Arrègulas - Acadèmia de su Sardu

6. S’ARTICULU
Partzeus s’artìculu in: determinadori e no determinadori.
6.1. Artìculu determinadori
In Camp. aciapaus is artìculus determinadoris afatantis:
a) su (masculinu singulari ananti de consonanti) comenti su fradi; ananti de
vocali ddu truncaus a s’ (comenti s’amigu);
b) sa (femininu singulari ananti de consonanti) comenti sa sorri; ananti de vocali
ddu truncaus a s’ (comenti s’amiga);
c) is (masculinu e femininu plurali) comenti is fradis, is amigus, is sorris, is
amigas.
De aguantai a notu ca s’artìculu determinadori ddu agataus imperau puru comenti
a pronòmini allobau cun sa prepositzioni de o cun su pronòmini relativu chi o a solu,
in logu de cussu/-us, cussa/-as, comenti in “su/sa de Pula lompit cras, is de su madau
sunt bènnius a sa festa, su/sa chi at fueddau tzerria-ddu/a, is chi ndi lompint imoi no
sunt de bidda, a su chi parit est marchendi tempus, dongat-mì sa barata (de pira),
su de no castiai s’ora est cosa bona”.
6.2. Artìculu no determinadori
Agataus
a) unu (masculinu singulari ananti de consonanti) comenti unu fradi; ananti
de vocali ddu truncaus a un’ (comenti un’amigu);
b) una (femininu singulari ananti de consonanti) comenti una sorri; ananti de
vocali ddu truncaus a un’ (comenti un’amiga);
c) unus (masculinu plurali) comenti unus trinta chilus;
d) unas (femininu plurali) comenti unas bintena de chilus.
De aguantai a notu ca chi s’artìculu no determinadori est acumpangiau de is
prepositzionis cun e in acostumat a si ponni impari a una /d/ eufònica (comenti in
“cun d-unu fradili, cun d-un’amigu, cun d-una sorresta, cun d-un’amiga, cun
d-unus cantu lìburus, cun d-unas cantu ampuddas, in d-unu mesi, in d-un’annu,
in d-una cida, in d-un’ora, in d-unus cantu mesis, in d-unas cantu diis”), chi nosu
scrieus acapiada a liniedda a s’artìculu etotu.
106