Arrègulas - Acadèmia de su Sardu

17.4. Lèssicu
Sendi custu sceti unu traballu de gramàtica normalisadora (prus atenta a is
formas e a sa grafia insoru), no est innoi sa seu po si stentai chistionendi de lèssicu,
ca at a depi essi cumpudau prus a fundu de cumissionis postas po cussu. Duncas
inditaus sceti is chi si parint is lìnias-ghias po su chi s’at a depi fai in su benidori.
At a tocai:
a) a preferri sèmpiri is fueddus sardus sintzillus o desinuncas is prus antigus
connotus (potecaria po *farmacia, pangàrgiu po *macellaju, genna po *porta,
grogu po *giallu);
b) a torrai a abiatzai fueddus de su connotu mancai no siant spainaus meda o
siant acalamaus (concoi po *digeriri);
c) a permiti, assumancu finsas a candu sa lìngua ofitziali no s’at a stabilessi,
is sinònimus (bufai a bruncu / intullu; fueddai / allegai; bolli / cherri; matessi /
pròpiu);
d) a preferri sèmpiri is fueddus chi ndi benint inderetura de su latinu (nexi
intamis de su prus trigadiu *curpa);
e) a amiti arricamentus de sentidus figuraus a is fueddus fitianus (sitzigorru po
*chiocciola o *at, portalitu de sa lìngua po *sportellu linguìsticu, sorixeddu po
*mouse, giassu de s’arretza po *situ internet);
f) a allogai fueddus stràngius chi ant pigau giai amori de domu (giòmetra,
giografia po *geòmetra, *geografia);
g) a no fai is fueddus nous e is fueddus artus segundu is arrègulas de evolutzioni
fonètica de su sardu, ma a sighiri sa forma de is cultismus internatzionalis (democràticu,
stòria, geotèrmicu po *demogràdigu, *stòrgia, *giotèrmigu);
h) a lassai a una parti is sufissus chi no funt sardus (-inu, -tzioni, -tivu), apoderendi-ddus
sceti in is fueddus scìpius chi ndi benint inderetura de su latinu (telefoneddu,
standardisadura, inditadori, ma corretzioni, tradutzioni, aministrativu);
i) a lassai a una parti is cràchidus de is àteras lìnguas, si teneus giai una forma
sarda sintzilla (week-end/fine settimana ‡ coa de cida);
l) a fraigai fueddus nous sighendi su gèniu de sa lìngua nosta, bastit chi si cumprendant
(sciàcua-pannus / màchina de sciacuai / lissiera po *lavatrici, sciàcuastrexu
/ màchina de fai strexu po *lavastoviglie);
m) a preferri sèmpiri, comenti fait sa polìtica linguìstica de is àteras lìnguas
neolatinas po su chi spetat a is fueddus inglesus, a pesai o a tradusi totu su chi fait
(computer ‡ computadori / carculadori / ordinadori);
n) pruschetotu po is fueddus de sa lìngua aministrativa, a fai una circa manna
me is documentus sardus antigus po torrai a pigai is fueddus chi imperamus e a ddis
alladiai su sentidu o a ddis donai unu sentidu nou (machìtzia po multa, òmini de
corona po giugi de paxi, corona po tribunali, meria po provìntzia).
182