Descarga en formato PDF - Centro Ramón Piñeiro para a ...

Anatolij Baránov e Dmitrij Dobrovol’skij. Aspectos teóricos da fraseoloxía
(37) Eu non me considero un pesimista, pero teño que dicir con toda
responsabilidade que se un se pon a reflexionar con máis atención sobre a
esencia da vida queda claro que todo remata coa morte. Nisto non hai nada de
particular, e mesmo non sería democrático se alguén de nós de súpeto quedase
vivo e se salvase. É obvio que todos queren vivir, pero cando pensas que
Leonardo da Vinci tamén morreu, é que simplemente руки опускаются [as
mans déixanse caer] (А. Terts. Xeada, Гололедица).
(38) а. Ó camarada Reutov máis lle valía te-la boca calada, pero é tan parvo que
nos vai denunciar en tódalas instancias. Está claro que, заварилась каша!
[cociñouse unha papa!]. A Genka pouco lle faltou para saír despedido dos
despachos dos secretarios antes de tempo. E mesmo o camarada Pilipenko nos
desafiaba... (V. Lipatov. E isto é todo sobre el, И это все о нем). b. E
заварилась каша [cociñouse unha papa] e saíulles ben, e púxose en marcha
a panca de Arquimedes do poderoso armamento soviético, e na prensa rusa
apareceron artigos de gran repercusión [...] (B. Leontev. Novas aventuras de
Ostap Bender, Новые приключения Остапа Бендера). c. E заварилась
каша [cociñouse unha papa] porque a declaración do KKK supoñía un plan
de «traballo», de «purgatorio» para liquidar tódolos funcionarios
comprometidos ata as orellas; foron comunicadas as súas biografías
detalladas, coa enumeración das obras, feitos e causas polos que se viron
sometidos á destrución (V. Golováchev. O interceptor, Перехватчик).
Así, a orientación cara á confluencia do «significado pasivo» e da «forma pasiva», é
dicir, ós tipos de pasivización canónicos, é unha premisa indispensable para calquera
intento de formulación de regras relativamente universais. As particularidades de cada
forma concreta quasi-pasiva e de cada lingua concreta pódense describir na seguinte
fase da investigación a modo de suplementos destas regras xerais e como
especificacións da súa aplicación. Con respecto á pasivización, as diferenzas entre as
linguas son ben coñecidas. Moitas delas están relacionadas cun grao diferente de
gramaticalización da pasiva. Así, no inglés a pasiva está gramaticalizada en maior
medida ca no alemán e no alemán en maior medida ca no ruso. No ruso a pasiva é unha
forma pouco frecuente, típica de verbos axentivos, véx. Апресян 2002; Падучева
2003: 196. Consecuentemente, é necesario describir calquera forma de pasiva noncanónica
(por exemplo, a pasiva de verbos estativos) por medio das regras particulares
específicas de cada lingua.
6.2.4. Regras de pasivización das UUFF
6.2.4.1. Condicións semánticas xerais
A condición máis importante para a creación de formas canónicas de pasiva ten un
carácter puramente semántico e non é específica das UUFF. En principio, as unidades
léxicas (os verbos e os fraseoloxismos verbais de calquera tipo) pódense pasivizar só
naqueles casos nos que se entenden coma verbos cunha semántica axentivo-transitiva.
Noutras palabras, hai que interpretar estes verbos coma verbos que designan unha
acción causada por unha entidade activa (obrigatoriamente un axente en sentido estrito)
Centro Ramón Piñeiro para a Investigación en Humanidades. Santiago de Compostela 2009 327