“Mangaral ng Aking Ebanghelyo

7 Pag-aralan ang Wika
146
Mga Tala
• Kilalanin na tinawag ka ng Diyos sa pamamagitan ng isang propeta.
• Mamuhay nang karapat-dapat sa pagsama ng Espiritu Santo.
• Maging masunurin sa mga kautusan at mga pamantayan ng misyonero.
• Taimtim na manalangin para sa tulong mula sa langit.
• Pag-aralan, praktisin, at gamitin ang wikang gamit sa misyon bawat araw.
Maging Dedikado at Masigasig
Ang pagkatutong magturo nang epektibo sa wikang gamit sa iyong misyon ay
nangangailangan ng sigasig. Huwag magulat kung parang mahirap itong gawin sa una.
Kailangan ng panahon para matutuhan ang isang wika. Maging matiyaga. Hingin ang
tulong ng iyong kompanyon, mga miyembro, investigator, at iba pang mga misyonero.
Huwag itigil ang pagpapahusay ng iyong kasanayan sa wika kahit nauunawaan ka na ng
mga tao. Habang humuhusay ka sa pagsasalita sa wikang ito, lalong pakikinggan ng mga
tao ang sinasabi mo kaysa sa paraan ng pagbigkas mo. Hindi ka na masyadong mag-aalala
kung paano mo sasabihin ang nadarama ng iyong puso. Mas mahusay mong matutugunan
ang pangangailangan ng mga investigator at ang mga paramdam ng Espiritu.
Sikaping maging napakahusay sa wika sa buong misyon mo at kahit nakauwi ka na.
Marami nang biyayang ibinigay sa iyo ang Panginoon, at maaaring gamitin Niya ang
kakayahan mo sa wika balang-araw. Ipinaliwanag ni Elder Jeffrey R. Holland: “Umaasa
kami . . . na bawat misyonerong nag-aaral ng bagong wika sa pagtuturo ay magpakahusay
rito hangga’t maaari. . . . At kapag ginawa ninyo ito, ang kakayahan ninyong magturo at
magpatotoo ay lalong iinam. Lalo kayong tatanggapin at espirituwal na hahangaan ng
inyong mga investigator. . . . Huwag makuntento sa iilang mahahalagang salitang alam ng
misyonero. Sikaping pag-aralan ang lahat ng mapag-aaralan ninyo sa isang wika, at lalo
ninyong maaantig ang puso ng mga tao” (satellite broadcast para sa mga misyonero,
Ago. 1998).
Hindi ka nag-iisa sa pag-aaral ng wikang gamit sa misyon. Sa tuwing magbibigay
ng kautusan ang Panginoon, nagbibigay Siya ng daan para maisagawa ito (tingnan sa
1 Nephi 3:7). Hingin ang Kanyang tulong. Maging dedikado sa iyong pag-aaral. Darating
ang oras na magkakaroon ka ng kasanayan sa wika na kailangan para magampanan ang
iyong layunin bilang misyonero.
Pag-aralan ang Ingles
Kung hindi ka marunong mag-Ingles, dapat mo itong pag-aralan bilang isang misyonero.
Pagpapalain ka nito sa iyong misyon at sa habambuhay. Ang pagkatuto ng Ingles ang daan
para makatulong ka sa pagtatayo ng kaharian ng Panginoon sa iba pang paraan at magiging
pagpapala ito sa iyo at sa iyong pamilya. Makakatulong sa iyo ang karamihan sa mga
mungkahi sa kabanatang ito. Magpokus sa sumusunod:
• Mithiin na makapagsalita ng Ingles kasama ang iyong kompanyon. Kung marunong
na ng Ingles ang kompanyon mo at sinisikap na pag-aralan ang iyong wika, maaari
ninyong piliing magsalita ng Ingles sa loob ng apartment at gamitin ang wika sa
misyon kapag nasa labas kayo.
• Kasama ang iyong kompanyon, basahin ang Aklat ni Mormon sa Ingles. Maaari din
kayong maghalinhinan: Magbasa ka ng talata sa Ingles, at pagkatapos ay babasahin ng
iyong kompanyon ang isang talata sa wikang gamit sa misyon. Itama ang pagbigkas at
tono ng boses ng bawat isa.