“Mangaral ng Aking Ebanghelyo

3 Mag-aral at Magturo
Lesson 3:
Ang Ebanghelyo ni Jesucristo
70
Mga Tala
Binyag, ang Ating Unang Tipan
Ang pananampalataya kay Jesucristo at pagsisisi
ang naghahanda sa atin sa mga ordenansa ng binyag
at kumpirmasyon. Ang ordenansa ay sagradong
seremonya na nagpapakita na nakikipagtipan tayo
sa Diyos.
Palaging hinihingi ng Diyos sa Kanyang mga anak
na makipagtipan. Ang tipan ay isang kasunduang
nagbibigkis at sagrado sa pagitan ng Diyos at tao.
Ipinapangako ng Diyos na pagpapalain tayo, at
nangangako tayo na susundin Siya. Ang Diyos ang
nagtatakda ng mga kondisyon ng mga tipan ng
ebanghelyo, na maaari nating tanggapin o tanggihan.
Ang pagtupad sa mga tipan ay naghahatid ng biyaya
sa buhay na ito at kadakilaan sa buhay na darating.
Ipinasailalim tayo ng mga tipan sa matinding
obligasyon na tuparin ang mga ipinangako natin sa Diyos. Para matupad ang ating mga
tipan, kailangan nating talikuran ang mga aktibiti o kinahihiligan na humahadlang sa atin
sa pagtupad sa mga tipang iyon. Halimbawa, hindi tayo mamimili at maglilibang tuwing
Linggo para mapanatili nating banal ang araw ng Sabbath. Dapat nating hangarin na
maging karapat-dapat sa pagtanggap ng mga tipan na iniaalok sa atin ng Diyos at sikaping
tuparin ang mga iyon. Ipinapaalala sa atin ng ating mga tipan na magsisi araw-araw. Sa
pagsunod sa mga kautusan at paglilingkod sa iba, matatanggap at mapananatili natin ang
kapatawaran ng ating mga kasalanan.
Ang mga tipan ay karaniwang ginagawa sa pamamagitan ng mga sagradong ordenansa,
gaya ng binyag. Ang mga ordenansang ito ay isinasagawa ng awtoridad ng priesthood.
Sa ordenansa ng binyag, halimbawa, nakikipagtipan tayo na tataglayin natin ang pangalan
ni Jesucristo, lagi Siyang aalalahanin, at susundin ang Kanyang mga kautusan. Kapag
tinutupad natin ang ating bahagi sa tipan, ipinapangako ng Diyos ang palagiang pagsama
ng Espiritu Santo, kapatawaran ng ating mga kasalanan, at pagkapanganak na muli.
Sa pamamagitan ng mga sagradong ordenansa, gaya ng binyag at kumpirmasyon,
natututuhan at nadarama natin ang kapangyarihan ng Diyos (tingnan sa D at T 84:20).
Itinuro ni Jesus na dapat tayong mabinyagan sa pamamagitan ng paglulubog sa tubig
para sa kapatawaran ng ating mga kasalanan. Ang binyag ay mahalagang ordenansa ng
kaligtasan. Walang taong makakapasok sa kaharian ng Diyos nang hindi nabibinyagan.
Ipinakita sa atin ni Cristo ang halimbawa nang Siya’y binyagan.
Ang pagbibinyag sa pamamagitan ng paglulubog ay simbolo ng kamatayan, paglilibing,
at pagkabuhay na mag-uli ng Tagapagligtas. Sa gayunding paraan, ito’y sagisag ng katapusan
ng dati nating buhay ng kasalanan at pangangako na mamuhay nang panibago bilang
disipulo ni Cristo. Itinuro ng Tagapagligtas na ang binyag ay pagsilang na muli. Noong
tayo’y binyagan, nagsimula tayo sa proseso ng muling pagsilang at naging espirituwal
na mga anak ni Cristo (tingnan sa Mosias 5:7–8; Mga Taga Roma 8:14–17).
Kailangan tayong mabinyagan para maging mga miyembro sa ibinalik na Simbahan,
Ang Simbahan ni Jesucristo ng mga Banal sa mga Huling Araw, at sa huli ay makapasok
sa kaharian ng langit. Ang ordenansang ito ay batas ng Diyos at dapat isagawa ng
Kanyang awtoridad. Dapat bigyan ng pahintulot ng bishop o mission president ang
maytaglay ng priesthood na magsagawa ng pagbibinyag o kumpirmasyon.