“Mangaral ng Aking Ebanghelyo

10 Mga Kasanayan sa Pagtuturo
206
Mga Tala
• “Sa talatang ito ay tinuturuan ni propetang Alma ang mga tao na maralita na manampalataya
sa salita ng Diyos. Inihahambing niya ang salita ng Diyos sa isang binhi na
maaaring itanim sa ating puso. Pakisimulan mo ngang basahin ang talata ...”
Basahin ang talata. Basahin nang malakas ang mga talata o ipabasa ito nang malakas sa
investigator. Maging sensitibo sa mga nahihirapang magbasa. Kung mahirap para sa
kanilang unawain ang talata, sabayan sila nang dahan-dahan at tulungan silang maunawaan
ang mas mahihirap na bahagi. O bigyan sila ng simpleng talatang babasahin.
Maaari mo ring ipaliwanag ang mahihirap na salita o parirala:
• “Humingi sa Dios, na nagbibigay ng sagana sa lahat at hindi nanunumbat [ibig sabihin
ng ‘hindi nanunumbat’ ay hindi naninisi o naghahanap ng mali ang Diyos] at ito’y
ibibigay sa kaniya” (Santiago 1:5).
Ang ilang talata sa mga banal na kasulatan ay malinaw at hindi na kailangang ipaliwanag.
Para sa iba ay kailangang may oras ka para ipaliwanag ang binasa.
Ipamuhay ang banal na kasulatan. “Ihalintulad” ang mga banal na kasulatan sa iyong sarili
at sa mga investigator sa pagpapakita kung paano naaangkop ang mga alituntunin sa
panahong ito (tingnan sa 1 Nephi 19:23). Ipakita sa mga investigator kung paano nila
maipapamuhay ang mga alituntunin. Sa paggawa nila nito, malalaman natin na totoo ang
doktrina. Magpatotoo tungkol sa alituntunin, at pangakuan sila ng mga biyaya. Halimbawa:
• “Ang mga tao ni Alma, tulad ninyo, ay may mabibigat na pasanin na halos higit pa sa
makakayanan nila. Pero nang manampalataya sila at ‘nagsumamo sila nang mataimtim,”
sila ay pinalakas Niya para makaya ang mga problema at pagkatapos ay iniligtas sila sa
mga pagsubok. Tulad ng ginawa Niya sa mga taong ito, alam kong tutulungan kayo ng
Diyos sa inyong mga pagsubok habang kayo ay . . .”
• “Ang tagubilin ni Alma sa mga tao sa mga tubig ng Mormon ay naaangkop sa atin
ngayon. John, handa ka bang . . .”
Malaki ang pagkakaiba ng mga taong tinuturuan mo, sa pananaw nila sa mga sagradong
teksto, sa kaalaman nila sa Biblia, sa pang-unawa nila sa sinasabi ng banal na
kasulatan at kung gaano nila pinaniniwalaan na ang Biblia ay salita ng Diyos. Tulungan
ang lahat ng investigator na pahalagahan ang mga banal na kasulatan. Sa mabisang
paggamit ng mga banal na kasulatan sa pagtuturo, matutulungan mo ang mga investigator
na magsimula sa kanilang pag-aaral ng mga banal na kasulatan. Matapos ang
bawat pagbisita, magmungkahi ng partikular na mga kabanata o talata na mababasa nila.
Maaari mo silang bigyan ng mga tanong na isasaisip habang nagbabasa sila, na maaari
ninyong pag-usapan sa susunod na pagbisita. Mahihikayat sila nito na pag-aralan ang
mga banal na kasulatan araw-araw sa kanilang tahanan at makibahagi sa mga miting ng
Simbahan at klase na gumagamit ng mga banal na kasulatan.
Mga Pananaw Tungkol sa Kultura ng mga Banal na Kasulatan
Karamihan sa mga relihiyon ay may mga sagradong teksto o mga aklat ng mga banal na kasulatan,
pero ang paggamit at pagkaunawa nila sa mga ito ay maaaring kaiba sa pananaw ng mga
miyembro ng Simbahan tungkol sa mga banal na kasulatan. Halimbawa, baka kailangan mong
ipaliwanag na ang pagmamarka mo ng mga banal na kasulatan ay patunay lang na gusto mong
maunawaan at maipamuhay ang mga turo nito at hindi tanda ng kawalang-galang. Tulungan ang
inyong mga tinuturuan na malaman na mahalaga ang mga banal na kasulatan dahil naglalaman
ang mga ito ng salita ng Panginoon na isinulat ng mga propeta ng Diyos at na dapat nating
tanggapin ang mga ito bilang katotohanan.