“Mangaral ng Aking Ebanghelyo

9 Paghahanap ng mga Tao
188
Mga Tala
– Komportable ba ang bishop na ialok mo ang tulong ng mga miyembro ng ward?
– Sino sa miyembro ng ward ang naglilingkod sa family history center o may karanasan
sa gawain sa family history?
– Paano kayo makahihinging mabuti ng tulong sa mga miyembrong ito.
– Sino ang maaaring sumama sa inyo kapag ipinasa ninyo ang mga pedigree chart
o family group record?
Basahin ang sumusunod na kuwento ng isang senior na misyonero. Tingnan ang papel
na ginampanan ng family history sa conversion ng mag-asawa.
Si Mildred Schultz ay tapat na miyembro ng kanyang simbahan. Kaya’t hindi kataka-taka nang
kumatok ang mga misyonero sa kanyang pintuan. Hindi siya nag-aksaya ng panahon at pinapasok
sila para ituro sa kanila ang “katotohanan.” Sa pagtuturo ng mga misyonero, naantig siya ng mga
katotohanan ng ipinanumbalik na ebanghelyo at nabinyagan. Sa buong proseso ng pagtuturo, ang
kanyang asawang si Frank, ay hindi nakinig.
Dito ako napasali. Ipinakilala kami ng mga elder kay Sister Schultz. Tinulungan namin siya na
simulan ang kanyang family pedigree at inimbitahan siyang makipagkita sa amin sa family history
center. Dumating ang araw ng aming pagkikita at tinanong ni Frank kung maaari siyang sumama
para masaliksik rin niya ang kanyang mga ninuno. Siyempre, natuwa siya sa pagkakataong iyon,
at nagpunta na sila sa center.
Plano ng mga elder na makipagkita sa amin nang medyo tanghali na sa araw na iyon. Bago sila
dumating, ipinakita namin kina Frank at Mildred ang aklatan at ipinakilala sila kay Sister Wright. Si
Sister Wright ang family history specialist, at nag-alok siyang tumulong na maghanap ng impormasyon
tungkol sa tatay ni Frank. Nakita niya ang pangalan nito sa isang aklat at nabigyan niya si Frank ng
isang mapa ng Germany. Makikita doon ang lugar ng kapanganakan ng kanyang ama. Natuwa siya sa
mga natuklasang ito kaya’t nang dumating ang mga elder, inimbitahan niya ang mga ito na maghapunan
para ipakita sa kanila ang mga larawan at ibahagi ang kanyang family history. Naantig at napalambot ng
Espiritu ni Elijah ang kanyang puso at naging daan ito para mapunan ng ebanghelyo ang kanyang buhay.
Nang gabing iyon, iniisip ni Mildred ang maaari niyang sabihin na makatutulong kay Frank na mas
maging interesado sa ebanghelyo. Isang tanong ang naisip niya. “Frank,” ang umpisa niya, “gusto mo
bang makapiling ako magpakailanman, kahit matapos na ang buhay na ito? Gusto mo bang magkaroon
ng walang hanggang pamilya?” Agad niyang sinabing, “Oh, Mildred, siyempre. Paano ko iyon
gagawin?” Ang tanong na ito ang ipinagdarasal niya. “Makinig ka sa sasabihin ng mga misyonero,”
sagot niya. Pumayag siya. Sa pagtuturo ng mga elder, natunaw ng mapagmahal na mensahe ng
Panunumbalik ang kanyang mga alinlangan at takot. Tinanggap niya ang mga katotohanang ibinahagi
ng mga misyonero. Tinanggap niya ang imbitasyong mabinyagan. Naging matatag at aktibo sina Frank
at Mildred sa Simbahan mula noon.
Masigasig na kinumpleto nina Frank at Mildred ang gawain nang sa gayon ang mga nakapagliligtas na
ordenansa ay maisagawa sa kanilang pamilya. Napakasayang araw nang binyagan sila para sa kanilang mga
kapamilya. Sa proseso ng pagsasagawa sa templo, napanaginipan ni Brother Schultz ang kanyang tatay.
Nakita niya ang kanyang tatay sa rantsong tinirahan nito noong bata pa. Nakatayo ang kanyang tatay sa tabi
ng kanyang tumba-tumba, nakaputing damit at iniaabot ang kanyang kamay sa kanyang anak. Nagising si
Frank na umiiyak. Alam niya na tinanggap ng kanyang tatay ang isinagawa nilang gawain sa templo.
Aktibiti: Pag-aaral ng Magkompanyon
• Ano ang nakaimpluwensya kay Frank para magdesisyong magpaturo sa mga misyonero?
• Paano ninyo mas mabuting maiuugnay ang gawaing family history sa plano ng Diyos sa
mga pamilya?
• Paano ninyo ginamit na kasangkapan ang family history sa paghahanap ng tuturuan?
Sa paanong paraan ninyo maibibigay ang impormasyon sa family history sa mga taong
makikilala ninyo araw-araw? Planuhing simulan na gamitin ang family history bilang mas
kilalang kasangkapan sa inyong paghahanap ng tuturuan.