Portret Magazine No13

УМЕТНОСТ ДО
ЅВЕЗДИТЕ „ПОРТРЕТ“ НА
„ПАРАТИСИМА ТОРИНО“
На покана на „Паратисима Скопје“, а заедно со македонските финалисти, „Портрет“
гостуваше на најпосетениот саем за современа уметност „Паратисима Торино“.
Пишува: Тања Тодоровска
Фотографија: Давиде Белука
Месецот што му претходеше на тринаесеттиот,
роденденски број на „Портрет“ почна невообичаено, но
ветувачки – по сите состаноци, договарања, планирања,
„Портрет“ ги спакува куферите за уште едно патување.
Добивме покана да гостуваме на дванаесеттото издание
на италијанскиот саем за современа уметност „Паратисима
Торино“ под мотото „Паратисима дo ѕвездите“, и тоа заедно
со финалистите од истиот настан во Скопје. Требаше да
претпоставам дека ваквото уметничко „отворање“ на
месецот ќе навести уште многу инспиративни и креативни
гости во декемвриското издание, па така до крајот на
месецот ја запознавме извонредната Рисима Рисимкин,
се воодушевивме од талентираната Ема Ананиевска,
се растопивме на фотографиите на Маја Аргакијева,
останавме заинтригирани пред делата на Игор Јосифов...
од денешна перспектива, тврдам дека ноември беше месец
на уметноста.
Но, да се вратам на почетокот. За тоа да го сторам најпрвин
ќе се вратам неколку години наназад, поточно до 2014
година, кога саемот на современа уметност „Паратисима“
првпат се одржа во Скопје, а од 2016-та свое деби доживеа
и во главниот град на Португалија, Лисабон. Во Италија
почнува во 2005 година, и тоа сосема случајно, по пат
на шега, кога неколку другари од Торино решаваат да
организираат изложба во еден празен стан. На првиот
настан учествуваат околу 15-тина уметници, а таа била
отворена за сите учесници и посетители. Буквално секој
со желба за креативно изразување на кој било начин
можел да се пријави, што е начело што е задржано до
ден-денес, и тоа во сите три градови. По десет години од
почетното изложување, „Паратисима Торино“ станува еден
од најважните настани поврзани со современа уметност во
Италија, а од 2012 година е и најпосетен. Во тоа се уверив и
самата уште на првата вечер од саемот кога буквално редици
луѓе трпеливо чекаа да стигнат до влезот. Меѓу нив имаше
лица од различни возрасти, деца, мајки со новороденчиња,
момчиња и девојки во придружба на своите кучиња (секогаш
во ваква пригода се прашувам дали и кога би било дозволено
ова кај нас). Интересно е што во исто време се одржува
уште еден саем на современа уметност на кој учествуваат
академски сликари – „Артисима“, па „Паратисима“, имајќи
ја предвид слободата за пријавување учесници, доаѓа
како негова антитеза или, ако така сакате, пародија. :) Но,
15.000 квадратни метри простор за изложување во „Торино
Еспозициони“, конструирана од познатиот архитект Пјер
Луиџи Нерви, и преку 600 уметници и креативни таленти се
многу повеќе од само пародија, нели?
120