Diccionariu toponímicu del conceyu de Xixón _bicolor_ - El Comercio

Diccionariu toponímicu del Conceyu de Xixón
La Güerta
Llugar de la parroquia de Serín, barriu de
Liérbado.
●Formación del topónimu: tamos ante’l
sustantivu asturianu güerta ‘terrenu acotáu
pa semar’.
●Etimoloxía: el sustantivu orixinariu ye
güertu, del llatín HŎRTUM [órtum] ‘güertu o
xardín’. El femenín güerta formóse
n’asturianu a partir del masculín, lo mesmo
qu’ocurre en castellanu con «huerto» y
«huerta».
El Güeyu
Llugar de la parroquia de Deva, barriu d’El
Pedroco.
●Formación del topónimu: trátase del
sustantivu asturianu güeyu, qu’ente otres
definiciones tien la de ‘sitiu onde naz una
fonte o un ríu’, que ye, nesti casu, un
furacu o güecu na peña.
●Etimoloxía: en cualesquier de les sos
acepciones, güeyu procede del llatín ŎCŬLUM
[ókulum].
●Referencia al llugar: ye’l sitiu onde naz el
ríu de Peñafrancia o Deva, debaxo de la
capiella de Peñafrancia. El ríu, n’efectu,
surde equí depués d’un percorríu soterrañu
procedente –según recientes esploraciones
espeleolóxiques– de les agües sumíes del
regatu de Riosecu; ver Riosecu. Enriba
construyóse la capiya de La Nuestra Señora
de Peñafrancia, de 1689; la lleenda diz que
la Virxe apaecióse equí un 8 de setiembre
(día que güei se fai la fiesta), y los vecinos
llevaron la so imaxe a la ilesia parroquial,
pero toles veces que lo facíen, la imaxe
volvía al sitiu del principiu, hasta que se
llevantó la capiella. Ver Peñafrancia.
●Documentación histórica del topónimu:
Xovellanos, nos Apuntamientos (1804),
refiriéndose al santuariu de Peñafrancia de
Deva, escribe: «La ermita está colocada en
el rellano de un alto peñasco a cuyo pie
rompe un riachuelo que, abriéndole a flor
de tierra y haciendo a su salida un ancho y
cristalino remanso, de dos a tres pies de
fondo, toma después su curso y forma con
sus aguas uno de los brazos del río de
Piles, que desagua en la playa oriental de la
villa. Este remanso se ve siempre lleno de
pequeñas truchas que, con título del güeyu
102
de Deva, se estiman mucho en Gijón por su
exquisito sabor».
El Güeyu l’Agua
Llugar de la parroquia de Serín, barriu d’El
Vallín.
●Formación del topónimu: topónimu
compuestu formáu de dos elementos. El
primeru ye’l sustantivu güeyu, col significáu
de ‘sitiu onde naz una fonte o un ríu’ (ver
El Güeyu). El segundu ye agua; anque
güei nun se conserva nel usu común, agua
usóse históricamente como sinónimu de ríu.
En resultes, El Güeyu l’Agua vien a equivalir
a ‘el nacimientu del ríu’. Prescíndese de la
preposición de (sería orixinariamente El
Güeyu del Agua), fechu mui corriente nel
asturianu cuando ta precedida de vocal: un
vasu lleche, la casa Xuan, etc. Esti
topónimu escríbese en palabres xebraes,
porque caúna d’elles caltién el so acentu
propiu, nes sílabes «güe» y «a».
●Etimoloxía: pa la etimoloxía de güeyu, ver
El Güeyu. Pela so parte, agua vien del
llatín AQUAM [ákuam], colos mesmos
significaos de ‘agua’ y ‘ríu’.
LA GUÍA
Barriu de la parroquia de Somió.
●Formación del topónimu: n’asturianu guía
significa, ente otres coses, ‘parte final o
superior d’un árbol o d’una planta’, ‘caña
principal d’un árbol o d’una planta’, ‘caña
nueva que sal del tueru d’un árbol o d’una
planta’. En sentíu metafóricu, guía paez
aludir a un biforcu o encruciada de
caminos, o bien una miesta de dos ríos. Les
dos circunstancies tán presentes nel llugar
de La Guía, onde s’amiesten los ríos Viñao y
Peñafrancia o Deva pa formar el Piles.
●Etimoloxía: guiar y guía proceden
quiciabes del góticu *WIDAN ‘axuntase,
amestase’, d’au tamién ‘acompañar,
escoltar’.
●Referencia al llugar: La Guía ye’l barriu
que tien como referencies la zona de la
ponte del Piles (El Puentín) y el biforcu de
la carretera Somió y la de Villaviciosa. La
primer conducción d’agua pa la ciudá de
Xixón procedía de La Guía y Les Mestes:
tratábase del acueductu de La Matriz,
construyíu ente 1646 y 1669, que nacía nel
llugar d’El Llanío, pasaba peles güelgues del