Diccionariu toponímicu del conceyu de Xixón _bicolor_ - El Comercio

Diccionariu toponímicu del Conceyu de Xixón
Los Campos
Llugar del distritu Este, barriu de L’Arena.
●Ver el siguiente.
Los Campos
Llugar del distritu Centro.
●Formación del topónimu: esti topónimu
formóse por encurtiamientu de la espresión
«Los Campos Elíseos», nome d’un teatru,
depués cine, qu’esistió na zona dende 1875
hasta 1964. Como n’otres ciudaes, el nome
púnxose, de xuru, por evocación de la
grandiosa Avenue des Champs Élysées
‘Avenida de los Campos Elíseos o Elisios’ de
París, símbolu de modernidá nes artes y
espectáculos naquelles dómines. Na
mitoloxía griega, los Campos Elíseos o
Elisios (en llatín ELYSII CAMPI, traducción del
griegu ELÝSIA PEDÍA) yeren un llugar de paz
y felicidá onde diben les almes de les
persones virtuoses desque morríen. Nel
París de fines del sieglu XVIII, esta zona
yera un terrenu llamargosu, enllenu polvu y
fediondu, sitiu d’alcuentru de xente de mal
vivir. P’allargar la perspectiva de les
Tulleríes, ficiéronse xardinos que recibieron
en francés el nome de Les Champs Élysées
‘Los Campos Elíseos o Elisios’, por
comparanza col llugar mitolóxicu. Polo
tanto, Los Campos de la ciudá de Xixón nun
tien nada que ver con otros llugares de
nome tradicional Los Campos qu’hai per
Asturies (por exemplu, nos conceyos de
Corvera, Ḷḷena, Nava, Siero o Villaviciosa).
●Etimoloxía: pa la etimoloxía de campu, ver
El Campu la Llenar.
●Referencia al llugar: nel añu 1875
inauguróse nesa zona xixonesa’l Teatro
Circo «Obdulia» (llamáu asina n’honor de la
fía del arquitectu Juan Díaz), que más tarde
camudó’l nome pol de Teatro «Los Campos
Elíseos», y cuando’l cine aportó a ser el
gran espectáculu de mases, llamóse Cine
«Los Campos Elíseos». El popular Cine los
Campos yera ún de los mayores d’España, y
en Xixón de los más activos, hasta que
peslló y se derribó en 1964. Punxo nome a
la zona, que dende aquella llámase
popularmente Los Campos. Actualmente
identifícase como Los Campos
aproximadamente les manzanes de cases
que tán ente la Carretera la Costa,
Menéndez Pelayo y la cai Aguado.
●Otres observaciones sobre’l nome: La
xente sigue llamando Calle los Campos o
Avenida los Campos a la continuidá de les
calles que lleven por nome oficial
«Menéndez y Pelayo» y «Ramón y Cajal»,
na cruciada cola carretera de la Costa. El
nome de Los Campos Elíseos nun tuvo más
reflexu nel nomenclátor oficial de calles que
na «Plazuela de los Campos Elíseos», actual
«Plaza de los Capuchinos».
El Campu la Llenar
Llugar de la parroquia de L’Abadía Cenero,
barriu de Piñera.
●Formación del topónimu: esti topónimu
compuestu ta formáu de dos palabres
asturianes. La primera, campu, que tien
dellos significaos: ‘terrenu pa pastu’,
‘terrenu d’usu públicu qu’hai al llau d’una
ilesia o d’una capiella y que pertenez a la
Ilesia o a la parroquia’, ‘terrenu acotao o
preparao pa facer feries, deporte o
práctiques militares’, ‘terrenu acotao pa
facer un mercáu o una fiesta’. L’otru
elementu del compuestu ye llenar, que pue
tener dos interpretaciones. Per un llau,
podría ser un deriváu d’una vieya palabra
prerromana *LENA ‘llábana’ (presente en
Ḷḷena, nome d’un conceyu y ríu d’Asturies),
y polo tanto significaría ‘sitiu de llábanes’.
Pero lo más posible ye que llenar seya una
pronunciación local del xeneral llinar ‘sitiu
semáu de llinu, onde abonda’l llinu’.
Trátase, polo tanto, d’un deriváu de llinu
‘planta del xéneru Linum de fueyes y tueru
llargos que da flores azules o marielles’, de
la que se sacaba y saca un texíu mui
apreciáu. El sufixu colectivu -ar ye bien
corriente n’asturianu: costellar ‘conxuntu de
costielles’, rebollar ‘sitiu onde abonden los
rebollos’. Prescíndese de la preposición de
(nun principiu sería El Campu de la Llenar),
fechu mui corriente nel asturianu cuando ta
precedida de vocal: un vasu lleche, la casa
Xuan, etc. Escríbese en palabres estremaes,
porque caúna d’elles conserva’l so acentu
propiu, nes sílabes «cam» y «nar».
●Etimoloxía: campu deriva directamente del
llatín CAMPUM [kámpum], col significáu de
‘terrenu rural abiertu y rasu’. Pela so parte,
llinu vien del llatín LĪNUM [línum], col mesmu
significáu que n’asturianu. El sufixu
colectivu -ar procede del llatín -AREM [árem].
46