Diccionariu toponímicu del conceyu de Xixón _bicolor_ - El Comercio

Diccionariu toponímicu del Conceyu de Xixón
Alffonso de la Figar, que ye en Gigion».
Nun documentu del Monesteriu de San
Pelayo d’Uviéu, del añu 1399, el contestu
xeográficu dexa más clara la identificación
d’esti topónimu: «Iten maes lle cobo el
quinto de los Arcos de sobre el fondero e la
faça del Carroçal et la faça de la Figar et el
quadro del Calavierno et la faça con martin
Alffonso et la faça de Matafillos». Nel
diccionariu xeográficu de Madoz (1845-50)
cítase como «Figal», ensin artículu y col
sufixu -al.
La Folguera
Llugar de la parroquia de Granda, barriu de
Granda de Riba.
●Formación del topónimu: trátase del
sustantivu asturianu folguera ‘felechu’, ‘sitiu
enllenu de folgueru’, una variante de
felguera. Ver El Felguerón. A pesar de les
apariencies, nun tien nenguna relación col
verbu folgar ‘nun trabayar, descansar’ (en
castellanu «holgar») y los sos derivaos.
●Etimoloxía: ver El Felguerón.
Folguera
Llugar de la parroquia de L’Abadía Cenero,
barriu de Veranes.
●Ver l’anterior.
●Documentación histórica del topónimu: ye
posible qu’esti topónimu seya’l qu’apaez
nun documentu del Monesteriu de San
Pelayo d’Uviéu, del añu 1391: «…la
jugueria quel dicho monesterio [de San
Pelayo de Oviedo] ha en Felgueras que es
en Veranes en la felegresia de Santianes de
Çenero, que es todo en el conçello de
Gigion». L’alternancia de singular a plural
pa nomar terrenos ye corriente
mesmamente güei en bien de casos. Como
yá se dixo en La Folguera (ver enriba),
folguera ye una variante de felguera.
El Fomento
Llugar del distritu Centro, barriu d’El
Centro.
●Formación del topónimu: esti topónimu
formóse a partir de la espresión «Dársena
de(l) Fomento», nome que sigue llevando
una de les componen el puertu vieyu de
Xixón. Tien el so orixe nel nome de la
empresa «Sociedad de Fomento de Gijón»,
conocida popularmente como (El) Fomento,
que construyó esa parte del puertu ente
1875 y 1885.
●Etimoloxía: el cultismu castellanu fomento
y l’asturianu fomentu signifiquen
‘favorecimientu de les condiciones
afayadices pa qu’esporpolle daqué’. Nel
sieglu XIX foi una espresión enforma usada
na política, na economía y na
alministración, con un significáu averáu al
de ‘progresu, desarrollu’. La denominación
«Ministerio de Fomento» ye clásica d’eses
dómines; na segunda metá del sieglu XX yá
sonaba a un arcaísmu, hasta que se rescató
pal nome d’un ministeriu nos años 90. La
palabra llatina que s’adaptó con esti
cultismu ye FOMĔNTUM, que significaba
‘coses que s’echen al fueu’, y tamién
‘calmante caliente’ (y d’aende l’asturianu
fomentu ‘melecina líquido que se pon en
paños calientes’); yera un deriváu del verbu
FŌVĒRE [fowére] ‘calentar’, que d’esa idea
pasaba tamién a ‘animar, alendar,
favorecer, facer esporpollar’.
●Referencia al llugar: gran parte de la
dársena d’El Fomento ocupábala la playa de
Pando (ver Pando). De magar la segunda
metá del sieglu XVI esistía un puertu d’una
dársena en Xixón. Depués de les estroces
que la mar produció a lo llargo de la primer
metá del sieglu XVIII, sucediéronse los
proyectos d’iguadura y ampliación. En 1872
Amadéu de Saboya promulga un Real
Decretu pa construyir un cai de más de 500
metros que se metería pela mar dende la
playa de Pando, ampliando asina’l puertu
de Xixón, que tenía una dársena acabada
en 1790. La construcción faise ente 1875 y
1885, con un dique en redondo y un
espigón que separa El Fomento d’otra
dársena más pequeña, que la xente llamó y
sigue llamando El Fomentín, qu’a fines de
los años 60 del sieglu XX tuvo a puntu de
rellenase pa llevantar edificios. Toa esta
zona de Xixón foi d’usu industrial. En 1979
zarró’l desguace de barcos que tovía
trabayaba n’El Fomento; dende aquella,
producióse la progresiva recuperación d’esi
espaciu urbanu, hasta convertise nuna de
les más animaes de la ciudá. Actualmente
ye’l puertu deportivu de Xixón.
85