Diccionariu toponímicu del conceyu de Xixón _bicolor_ - El Comercio

Diccionariu toponímicu del Conceyu de Xixón
porque caúna d’elles conserva l’acentu
propiu, nes sílabes «lla» y «me».
●Etimoloxía: pal orixe del primer elementu,
ver El Llano. L’axetivu mediu procede del
llatín MĔDĬUM, acusativu masculín MĔDĬUS -A -
UM, col mesmu significáu.
●Referencia al llugar: lo más corriente ye
qu’un topónimu con medio tenga correlatos
con riba y con baxo. Nesti casu cúmplese:
ver El Llano de Baxo y El Llano de Riba.
El Llano del Medio estiéndese dende la cai
Espronceda hasta la cai María Josefa.
Los Llanones
Llugar de la parroquia de Llavandera, barriu
d’El Monte.
●Formación del topónimu: lo que nos apaez
equí ye’l sustantivu asturianu llanones,
plural de llanón, aumentativu de llanu, col
significáu de ‘terrenu llanu’.
●Etimoloxía: del llatín PLANUM ‘llanu’. El
sufixu aumentativu plural -ones provién del
llatín -ŌNES [-ónes].
LLANTONES
Barriu de la parroquia de Leorio / Llorio.
Códigu alministrativu: 24.14.01. Nome
oficial anterior: «Llantones».
●Formación del topónimu: esti topónimu ta
formáu col sustantivu asturianu llantones,
plural de llantón ‘árbol nuevu preparáu pa
tresplantar’. Pue interpretase tamién como
un deriváu aumentativu de llanta ‘atoñu,
árbol nuevu que sal d’un árbol que se
cortó’, ‘planta, yerba o árbol d’un
conxuntu’.
●Etimoloxía: l’orixe de llanta ta nel llatín
PLANTAM ‘planta, brotu, atoñu’. El sufixu
aumentativu plural -ones tien aniciu nel
llatín -ŌNES.
●Referencia al llugar: Llantones ye tamién
el nome del ríu que s’amiesta col más
abaxo Piles. Esti ríu foi’l qu’abastó la primer
traída moderna d’agües a Xixón, dende La
Fuentona los Mingones. Les obres
empezaron el 17 d’agostu del 1887, fecha
que se recuerda nel nome d’una cai de
Xixón, y acabaron en 1890. La conducción
pasa pelos depósitos de Roces y llega a
Xixón per La Puerta la Villa, pa llueu
distribuyise per tola ciudá.
●Documentación histórica del topónimu:
pue apaecer cola grafía «Llantones» o
113
«Lantones», que supón en tou casu una
pronunciación con ll- inicial que llega hasta
agora. Esta oscilación pue atopase nel
Llibru del Cai: «Diego Menendez de
Lantones, juez», «Diego Menendez de
Llantones, juez» (añu 1561); «Rodrigo
Quilos de Lantones», «Diego Menendez de
Lantones» (añu 1568). Pela cueta, nel
Llibru Ordinariu la grafía con ll- inicial ye
mayoritaria: «Diego Menendez de
Llantones» (añu 1576). Nun documentu del
añu 1611, «le conpro a alonso dela bega y
a su mujer vznos. de Llantones de este qo.
una losa de heredad con sus arboles
debaxo de la casa do bibian en dho. pueblo
de Llantones por seys ducados…»; nel añu
1648, «…la casa y guerta debajo de la casa
y las demas heredades, prados y
castañedos y arboles frutales
pereternecientes [sic] ala dicha Cassa y
todos los demas que el susodicho tiene en
el llugar de Lantones y en el llugar de
Samartino de Buerces sitios en el concejo
de Gijon…». Nel Catastro del Marqués de la
Ensenada (1752) cítase «Llantones».
Llareo
Llugar de la parroquia de La Pedrera, barriu
de La Pedrera.
●Formación del topónimu: palabra non
reconocible nel asturianu actual fuera del
usu como topónimu. Ye posible que teamos
ante un deriváu de llera ‘sitiu o terrenu
onde hai muncha piedra suelto’, ‘tierra de
les que formen un cortinal’; esti deriváu
sería en principiu *lleréu, de la mesma
familia que lleráu, lleregal, llerisca, lleriscal,
lleriza, o mesmamente con «a», llaracal,
que funcionen toos ellos como sinónimos
de llera. Otra hipótesis ye que teamos ante
un deriváu de llar ‘piedra qu’hai na cocina
de la casa tradicional onde se priende’l
fueu’, ‘cuartu de la casa tradicional onde se
fai’l fueu’ (en castellanu «hogar»), como lo
ye’l so sinónimu llarera.
●Etimoloxía: si vien de llera, l’orixe ye
d’esta palabra ye’l llatín GLARĔAM [gláream],
col mesmu significáu que n’asturianu; el
topónimu Llareo vendría entós d’una forma
llatino-vulgar *GLARĒTUM, col sufixu colectivu
-ĒTUM, y entós sería equivalente al
topónimu cántabru Laredo, del mesmu
orixe. Pela so parte, llar vien del llatín LAREM
[lárem], referío a caún de los dioses