Diccionariu toponímicu del conceyu de Xixón _bicolor_ - El Comercio

Diccionariu toponímicu del Conceyu de Xixón
refierse a una versión más pequeña y más
ruina del oxetu designáu col femenín.
N’efectu, cabezu significa ‘cabeza pequeña
y ruina’, qu’en referencia al terrenu pue
designar una elevación o cuetu
arredondiáu. Pela so parte, cabeza tien
tamién acepciones posibles na toponimia y
quiciabes en relación con cabezu, como son
‘parte cabera d’un oxetu o d’un sitiu’, ‘cabu
abultáu, enancháu, arredondiáu d’un oxetu
allargáu’, ‘parte más alta d’un valle, d’un
monte o d’un picu’. Ha tenese en cuenta
que tamién significa ‘planta yerbácea de
tallu duru y flor de color morao’.
●Etimoloxía: el sustantivu asturianu cabeza
provién del llatín vulgar CAPĬTĬA [kapítia],
variante del clásicu CAPŬT [káput] ‘cabeza’.
CABUEÑES
Parroquia. Códigu alministrativu: 24.03.00.
Nome oficial anterior: «Cabueñes».
●Formación del topónimu: palabra non
reconocible nel asturianu actual fuera del
usu como topónimu.
●Etimoloxía: Hai delles hipótesis pa esplicar
el nome de Cabueñes. Según una d’elles,
l’aniciu taría nun nome d’home, BŎNĬUS,
d’época romana o altomedieval; con él
formaríase la espresión CASA BŎNĬIS [kása
bóniis] ‘la casa de Bonius’. N’asturianu ye
bien corriente que’l sustantivu casa,
cuando-y sigue’l nome del amu, s’encurtia
en ca; per otru llau, la «ŏ» del llatín
conviértese nel diptongu «ue», y una
secuencia «ni + vocal» da llugar a una «ñ».
D’aende resultaría Ca(sa)buéñes, ye dicir,
Cabueñes. Pue pensase tamién nun
compuestu de la palabra llatina CAPŬT
‘cabeza, cabecera, parte cabera, cabu’ y la
voz prerromana *ŎNNA ‘ríu’, significando
entós ‘la cabecera del ríu’. Tien pocu
fundamentu una etimoloxía a partir del
nome llatín GAVINIUS, como albidraba
Xovellanos.
●Documentación histórica del topónimu:
nun documentu de San Isidoro de Lleón,
del añu 1181, apaez «in Cauonias,
Pelagium Regem»; nel Inventariu de
Parroquies del añu 1385, «Santa Olalla de
Camuennes», una variante cola confusión
de «m» por «b», al estilu d’almóndiga en
cuenta albóndiga. Hai que tener en cuenta
que na documentación medieval asturiana
la «nn-» suel ser la representación escrita
d’una pronunciación con «ñ». Nel Llibru del
Cai, añu 1567, yá apaez na forma actual:
«Alonso de la Reonda, vezino de
Cabueñes», «en la dicha felegresia de
Cabueñes». Nel Catastro del Marqués de la
Ensenada (1752) cítase como «Cabueñes».
Nel Llibru Ordinariu obsérvase della
oscilación ente la forma autóctona y una
castellanización del tipu «Cabueñas», que
nun cuayó nin llegó al usu alministrativu
modernu: «y en la aldea de Cabueñas a
Toribio de la Reonda», «En Cabueñas a
Diego de Piñueli», «Cabe a Cabueñas…»,
«En Cabueñas a Marcos de Billanueba»
(añu 1576); «Juan de Zifuentes de
Cabueñes» (añu 1577); «E luego nonbraron
en Cabueñes a Luques de la Ballina» (añu
1578); «y en Cabueñes dijo que nonbraba y
nonbró a Marcos Menendez por fiel e
cogedor» (añu 1577).
●Otres observaciones sobre’l nome: los
falantes más tradicionales de la propia
parroquia, del conceyu de Xixón y otros
cercanos, dicen Cagüeñes, variante mui
espardida y quiciabes más xenuina dende’l
puntu de vista de la fala tradicional, pero
non dende’l puntu de vista de la so forma
histórica.
Cadianes
Llugar de la parroquia de Fano, barriu de
Carceo.
●Formación del topónimu: palabra non
reconocible nel asturianu actual fuera del
usu como topónimu.
●Etimoloxía: nun se conoz a ciertes, pero
puen dase dos hipótesis abondo
verosímiles. Según una, l’orixe d’esti
topónimu paez tar na espresión orixinaria
Casa de Ianes, col significáu de ‘Casa de
Xuan’. N’efectu, Ianes yera una forma
medieval del nome «Xuan», de la mesma
procedencia y significáu que los apellíos
Yanes, Yáñez, Ibanes o Ibáñez, y provién
del llatín IOHANNIS o IOHANIS [yoánis] ‘de
Xuan’, xenitivu de IOHANNES o IOHANES
[yoánes] ‘Xuan’. Casa de Ianes pasó a Casa
d’Ianes, calteniendo dos acentos o golpes
de voz nes sílabes «cá» y «diá»; depués,
cola perda del primer acentu, les dos
palabres fundiéronse nuna, Casadianes (en
conceyu de Siero, na parroquia de
Samartindianes, esiste’l topónimu Les
Casadianes, hermanu d’esti de Xixón).
37