Diccionariu toponímicu del conceyu de Xixón _bicolor_ - El Comercio

Diccionariu toponímicu del Conceyu de Xixón
dañibles o inútiles depués de quemales, pa
facer d’ello un prau o una ería’. N’asturianu
esisten tamién los sustantivos quemáu y
quemada ‘terrenu destruyíu pol fueu’, que
na toponimia refierse de xuru a la
operación yá mentada (ver tamién Les
Quemaes, El Barriu Quemáu).
La Bustia
Llugar de la parroquia de Fano, barriu de La
Cuadra.
●Formación del topónimu: ver l’anterior.
●Etimoloxía: ver l’anterior. El fechu de que
na Edá Media apaeza documentao «La
Ustia» pue debese a la perda de la b- inicial
nun contestu intervocálicu, pero tamién se
pue albidrar un orixe directu a partir del
participiu llatino-clásicu ŪSTUM ‘quemáu,
abrasáu’.
●Documentación histórica del topónimu: na
Edá Media apaez «…termino de la Ustia»,
«seve de la Ustia de Abaxo […] y Ustia de
Arriba».
La Cabaña
Llugar de la parroquia de Cabueñes, barriu
de Cimavilla.
●Formación del topónimu: tamos ante’l
sustantivu asturianu cabaña ‘construcción
fecha en monte o nun puertu, que
s’emplega pa guardar animales, pa meter
yerba o de vivienda’, ‘conxuntu de vaques o
de gües’, ‘sitiu onde se dexa en branu les
vaques, los gües que nun se precisen pa
trabayar’.
●Etimoloxía: provién de la palabra
llatinizada CAPANNAM [kapánnam], tomada
de dalguna llingua prerromana y de
significáu inciertu.
La Cabaña’l Marqués
Llugar de la parroquia de Caldones, barriu
de Riosecu.
●Formación del topónimu: ye un topónimu
compuestu de dos palabres asturianes:
cabaña (ver La Cabaña) y marqués
‘persona con títulu de nobleza per baxo’l
duque y penriba’l conde’.
●Etimoloxía: pal orixe de la palabra cabaña,
ver La Cabaña. El sustantivu marqués -esa
significaba nun principiu ‘cabezaleru d’una
marca o territoriu fronterizu’; marca ye
palabra de procedencia xermánica.
Prescíndese de la preposición de (nun
principiu sería La Cabaña del Marqués),
fechu mui corriente nel asturianu cuando ta
precedida de vocal: un vasu lleche, la casa
Xuan, etc. Esti topónimu escríbese en
palabres xebraes, porque caúna d’elles
caltién el so acentu propiu, nes sílabes
«ba» y «qués».
●Referencia al llugar: La Cabaña’l Marqués
ye’l monte cimeru de Caldones, en Cordal
de Deva, con 549 m. d’altura. Hai restos
d’una necrópolis megalítica de cuatro
túmulos, de va más de 4.000 años, sobre’l
valle de Riosecu y na llende con Villaviciosa.
Les Cabañes
Llugar de la parroquia de Caldones, barriu
de San Pelayo.
●Formación del topónimu: fórmase esti
topónimu col sustantivu asturianu cabañes,
plural de cabaña. Ver La Cabaña.
●Etimoloxía: ver La Cabaña. El plural
cabañes vien directamente del llatín
CAPANNAS.
Les Cabañes
Llugar de la parroquia de Llavandera, barriu
d’El Monte.
●Ver l’anterior.
●Referencia al llugar: anque
alministrativamente Les Cabañes ye un
nucleu de población de la parroquia de
Muñó, en conceyu de Siero, la xente de
Llavandera llama asina tamién les cases del
barriu d’El Monte que queden na parte más
alta de la parroquia, rayantes con Siero.
LES CABAÑES
Barriu del distritu Oeste, parroquia urbana
de Jove / Xove.
●Ver los anteriores.
El Cabezu
Llugar de la parroquia de Serín, barriu d’El
Gallinal.
●Formación del topónimu: ye’l sustantivu
asturianu cabezu, masculín formáu a partir
de cabeza; en casos como ésti, el masculín
36