Diccionariu toponímicu del conceyu de Xixón _bicolor_ - El Comercio

Diccionariu toponímicu del Conceyu de Xixón
La Carbayera Candenal
Llugar de la parroquia de Somió, barriu de
Candenal.
●Formación del topónimu: esti topónimu
compuestu ta formáu por dos elementos: el
sustantivu asturianu carbayera ‘sitiu pobláu
de carbayos’ (ver La Carbayera), y el
topónimu Candenal (ver Candenal).
Prescíndese de la preposición de (nun
principiu sería La Carbayera de Candenal),
fechu mui corriente nel asturianu cuando ta
precedida de vocal: un vasu lleche, la casa
Xuan, etc. Esti topónimu escríbese en
palabres xebraes, porque caúna d’elles
caltién el so acentu propiu, nes sílabes
«ye» y «nal».
●Etimoloxía: pa la etimoloxía de carbayera
y carbayu, ver El Carbayu Blancu; pa la
etimoloxía de Candenal, ver Candenal.
●Referencia al llugar: carbayera que ta
cerca’l cementeriu parroquial, pegando cola
raya cola parroquia de Cabueñes.
●Otres observaciones sobre’l nome: la
xente del llugar diz simplemente La
Carbayera, que ye tamién el nome que se-y
da a una moderna urbanización.
El Carbayeru
Llugar de la parroquia de Caldones, barriu
de Robleo.
●Formación del topónimu: tamos ante’l
sustantivu asturianu carbayeru, masculín de
carbayera ‘sitiu pobláu de carbayos’,
formáu col nome del carbayu al que se-y
amiesta’l sufixu colectivu -eru. N’asturianu
tien otros sinónimos como carbayal,
carbayéu, carbayeda, carbayedal,
carbayada; ver La Carbayera.
●Etimoloxía: pal orixe del asturianu
carbayu, ver El Carbayu Blancu. El sufixu
colectivu -eru ye evolución del llatín - ĀRĬUM
[-árium].
●Otres observaciones sobre’l nome: dase
tamién la variante en plural Los Carbayeros.
El Carbayu Blancu
Llugar de la parroquia de Samartín de
Güerces, barriu d’El Monte.
●Formación del topónimu: esti topónimu ta
formáu con un nome asturianu compuestu,
κ carbayu blancu, espresión equivalente a
carbayu albar, que designa’l ‘carbayu de
madera perbono’. El primer elementu del
compuestu ye’l sustantivu asturianu
carbayu ‘Quercus robur, árbol caducifoliu
de madera duro y bono, que tien les fueyes
pequeñes y col borde lobuláu’, ‘Quercus
petraea, árbol montés asemeyáu al Quercus
robur’ (en castellanu, «roble»). El segundu
elementu ye’l masculín del axetivu
asturianu blancu -a -o, n’alusión al color y
quiciabes a la calidá; la mesma referencia
fai albar en carbayu albar. El Carbayu
Blancu escríbese en palabres xebraes,
porque caún de los elementos conserva’l so
acentu propiu, nes sílabes «ba» y «blan».
●Etimoloxía: l’asturianu carbayu debe tener
relación con carba ‘monte, maleza, ‘terrenu
con monte y maleza’, palabra d’orixe
desconocíu, quiciabes prerromana. Pela so
parte, l’axetivu blancu -a -o procede del
xermánicu BLANK ‘resplandiente, blancu’,
palabra que tovía pervive nes llingües
xermániques como l’inglés (blank ‘que ta en
blanco, vaciu’).
Carbonero
Llugar de la parroquia de Fano, barriu de
Carceo.
●Formación del topónimu: n’asturianu un
carboneru ye una ‘capa de carbón pequeña,
normalmente allugada cerca d’otra más
grande’; ye corriente qu’un masculín en -u
quede fixáu na toponimia de l’Asturies
central en -o. Ye un deriváu de carbón
‘mineral que se forma al descomponese a
poco y a poco sustancies orgániques
fosilizaes y que s’emplega como
combustible’, col sufixu -eru, qu’indica
llugar onde abonda daqué.
●Etimoloxía: el sustantivu carbón provién
del llatín CARBŌNEM [karbónem], col mesmu
significáu. El sufixu -eru (nesti casu -ero)
procede del llatín - ĀRĬUM [-árium].
●Referencia al llugar: Carbonero ye tamién
el nome d’un regatu y una fonte.
●Documentación histórica del topónimu:
nun documentu del Monesteriu de San
Vicente d’Uviéu-1, del añu 1144, apaez:
«Cuius uille terminos ita asignamus: per
Carzedo et per Caruonero…». Nel Catastro
del Marqués de la Ensenada (1752) cítase
«el Monte de Carbonero».
53