Diccionariu toponímicu del conceyu de Xixón _bicolor_ - El Comercio

Diccionariu toponímicu del Conceyu de Xixón
●Documentación histórica del topónimu: a
falta de más datos, «Juan Moniz de Villar»,
nel Llibru del Cai (añu 1573) pue referise a
esti Villar de San Andrés de los Tacones, o
al anterior de Fresno. Lo mesmo pue dicise
de cites recoyíes nel Llibru Ordinariu, como
esta del añu 1576: «nombró a Fernando
Garcia de Billar, el mozo».
LOS VILLARES
Barriu de la parroquia de Caldones. Códigu
alministrativu: 24.04.07. Nome oficial
anterior: «Villares».
●Formación del topónimu: trátase del
sustantivu asturianu villares, plural de villar.
Ver Villar.
●Etimoloxía: ver Villar y Cimavilla.
●Otres observaciones sobre’l nome: el
nome hasta agora oficial, «Villares»,
prescindía del artículu inxustificadamente.
VILLAVERDE
Barriu de la parroquia de Samartín de
Güerces. Códigu alministrativu: 24.11.04.
Nome oficial anterior: «Villaverde».
●Formación del topónimu: topónimu
compuestu formáu por dos elementos. El
primeru ye’l sustantivu asturianu villa (ver
Cimavilla). El segundu paez, en principiu,
l’axetivu asturianu verde, pero hai otres
hipótesis que s’esponen más abaxo. Esti
topónimu escríbese nuna sola palabra,
porque tien un únicu acentu na sílaba
«ver».
●Etimoloxía: pal orixe de villa, ver
Cimavilla. L’axetivu verde provién del llatín
VĬRĬDEM [wíridem], col mesmu significáu.
Dao que’l verde ye un color qu’invade’l
paisaxe asturianu per auquier, esti verde
tendría dalguna carga de significáu
suplementaria; pue pensase, por exemplu,
que Villaverde aludiere a una villa o casería
‘más verde’ qu’otres, quier dicise, más
granible o fértil. De toes maneres, y
acordies con otres hipótesis, l’elementu -
verde d’esti topónimu nun sería l’axetivu
referíu al color, sinón que procedería d’un
nome romanu d’home, que sería l’amu de
dalguna tierra o finca (en llatín VĪLLA).
Sobre esi nome propiu hai delles hipótesis:
o bien VERTĬUS, que nel casu llamáu xenitivu
fadría VĒRTĬĪ [wértii] ‘de Vertius’, nuna
espresión como VĪLLAM VERTĬĪ ‘la finca de
213
Vertius’; o bien BERTUS, xenitivu BERTĪ
[bérti] ‘de Bertus’, en VĪLLAM BERTĪ ‘la finca
de Bertus’; o bien VĬRĬDUS, xenitivu VĬRĬDĪ
[wíridi], en VĪLLAM VĬRĬDĪ ‘la finca de
Viridius’.
Viñao
Llugar de la parroquia de Castiello
Bernueces, barriu de Castiello Bernueces.
●Formación del topónimu: de mano, trátase
del nome d’un ríu. Ye probable que teamos
ante dalgún tipu de deriváu de viña ‘tierra
semada de vides’, o un participiu del verbu
viñar ‘prender les plantes o los inxertos’,
‘espoxigar y espardese una planta’. En
resultes, Viñao fadría referencia a un ‘ríu
con viñes’, o bien a un ‘ríu arrodiáu de
plantes’. Pero son posibles otres hipótesis
de les que se fala nel apartáu siguiente.
●Etimoloxía: si l’orixe ta en viña, provién
del llatín VĪNĔAM [wíneam], col mesmu
significáu. La terminación de participiu -ao
vien del llatín -ĀTUM. Sicasí, a Viñao podría
suponése-y otra procedencia a partir d’una
confusión con *Viyao, quiciabes del llatín
VIĀTUM [wiátum], deriváu de VĪA ‘camín’, y
en resultes vendría a significar ‘sitiu onde
hai un camín’; Viyáu ye topónimu actual en
Nava, parroquia d’El Remediu; hai tamién
Viyao en Piloña, parroquia de Boriñes.
●Documentación histórica del topónimu: en
documentos del Monesteriu de Santa María
de la Vega, añu 1508, lléese: «heredad que
dizen de las vegas de Viñao». Nel Catastro
del Marqués de la Ensenada (1752) cítase
como «el Rio de Biñao», nuna época onde
entá nun había regularidá ortográfica.
Xovellanos escribe nel so Diariu «callejas de
Viñado», qu’hai qu’interpretar como caleyes
de Viñao.
Les Viñes
Llugar de la parroquia de Llavandera, barriu
de Llavandera.
●Formación del topónimu: atopámonos col
sustantivu asturianu viñes, plural de viña
‘tierra semada de vides’.
●Etimoloxía: viña provién del llatín VĪNĔAM
[wíneam], col mesmu significáu; el plural
viñes vien de VĪNĔAS [wíneas].
●Documentación histórica del topónimu: ye
posible que se faiga referencia a esti
topónimu nesta cita del Llibru Ordinariu,