Diccionariu toponímicu del conceyu de Xixón _bicolor_ - El Comercio

Diccionariu toponímicu del Conceyu de Xixón
cimbles, que crez esguilando per otres
plantes’, o tamién una ‘vara fina y cimble’;
en castellanu «vilorto» o «clemátide». Ye
corriente que na toponimia de l’Asturies
central una -u del masculín singular
(bilortéu) quede fixada nel usu en -o
(bilorteo), por razones morfolóxiques
propies de la llingua asturiana.
●Etimoloxía: bilortu o biluertu tien una
etimoloxía desconocida. Una hipótesis bien
espardida ye la que pon l’orixe d’esta
palabra nuna llingua prerromana de la
Península, en relación quiciabes col vascu
bilur o bihur ‘arreyadura o atadura de cañes
o de bilortos’, bihurtu ‘retorcer’, bildu
‘axuntar, recoyer’. El sufixu colectivu o
abondantivu -éu procede del llatín -ĒTUM [étum],
col mesmu significáu.
●Documentación histórica del topónimu: nel
diccionariu xeográficu de Madoz (1845-50)
vien esti topónimu castellanizáu como
«Vilortedo».
BILORTEO
Barriu de la parroquia de Serín. Códigu
alministrativu: 24.21.18. Nome oficial
anterior: «Vilorteo».
●Ver l’anterior.
●Otres observaciones sobre’l nome: la
forma actualmente oficial ye correcta
ortográficamente, dao que bilortu y los sos
derivaos escríbense con «b». Dacuando
tiense visto escrito como «Villorteo», que
nun tien fundamentu.
La Bornada
Llugar de la parroquia de L’Abadía Cenero,
barriu de Picún.
●Formación del topónimu: tenemos nesti
casu la palabra asturiana bornada o
borronada, definío como ‘conxuntu de
borrones’, ‘terrenu onde se faen borrones
de broza o de tapinos’, ‘terrenu ganao al
monte faciendo borrones, llabrao y
preparao pa semar’, ‘borrón grande’.
N’asturianu, un borrón ye un ‘montón de
broza o de tapinos que se quema nun
terrenu, con munchu fumu y poca llama,
que se fai p’abonar o pa llimpiar’, y tamién
‘señal que queda nun prau o nuna tierra,
dempués de facer una foguera con broza’.
Faise usu del sufixu -ada, cola idea de
‘conxuntu’ (como en nial → nialada).
●Etimoloxía: la palabra asturiana borrón,
colos significaos conseñaos enriba, tien un
orixe inciertu. Quiciabes s’entemezan o
confundan delles procedencies: o bien el
célticu BŬRRA ‘tela de llana basto, parte más
curtia y grosera de la llana’, que da llugar al
asturianu borra ‘pelusa que suelta la llana
al abrilo y arbelalo’, ‘posu que dexen los
líquidos al ferver o al posar’, ‘restu que
queda depués de quemar daqué’; o bien el
griegu dialectal BORRÂS ‘aire del Norte’,
deriváu del griegu clásicu BORÉAS ‘aire del
Norte’, que taríen nel orixe de palabres
asturianes como borrín o borrina ‘masa de
vapor d’agua en condensación que
s’acumula al ras de la tierra o de la mar’
(castellanu «niebla»); y el verbu llatín
COMBŪRĔRE [kombúrere], simplificáu en
BŪRĔRE [búrere], col significáu de ‘quemar’.
Ver tamién Los Borraderos y Los
Borronales.
La Boroñá
Llugar de la parroquia de Valdornón, barriu
de Quintana.
●Formación del topónimu: la procedencia
d’esti topónimu ye’l sustantivu asturianu
κ boroñada, equivalente a boroñal ‘tierra
semada de boroña o maíz’. Nesta zona del
conceyu Xixón, la terminación -ada suel
pronunciase como -á, y d’aende la variante
boroñá. Trátase, claramente, d’un deriváu
del sustantivu boroña, que significa ‘pan de
fariña de maíz’, pero tamién se pue referir a
la planta ‘Zea mays, maíz’.
●Etimoloxía: nun se conoz a ciertes l’orixe
de la palabra boroña. Quiciabes proceda de
la palabra prerromana *BORŬNA o *BORŬNNA,
en relación con dalgún cereal panible. El
sufixu –ada procede del llatín –ĀTAM [átam].
●Referencia al llugar: La Boroñá y Los
Borronales yeren dos antiguos praos
qu’agora tán fundíos nún solu, siendo válida
pal conxuntu cualesquier de les dos
denominaciones, anque paez que s’impón
la primera.
●Otres observaciones sobre’l nome: el
nome usáu anteriormente nos mapes, «La
Boroñada», nun respondía a les
característiques de la fala del sueste del
conceyu de Xixón, onde se pierde la -d-
intervocálica na terminación -ada.
32