Diccionariu toponímicu del conceyu de Xixón _bicolor_ - El Comercio

Diccionariu toponímicu del Conceyu de Xixón
EL FONDÓN
Barriu de la parroquia de Deva. Códigu
alministrativu: 24.06.02. Nome oficial
anterior: «Fondón».
●Formación del topónimu: n’asturianu, un
fondón ye una ‘fondigonada’, ‘parte baxera
de daqué’. Trátase d’un deriváu del
sustantivu fondu ‘parte fondera de daqué’,
ye dicir, ‘parte que ta no baxo’, al que se-y
amiesta’l sufixu aumentativu -ón.
●Etimoloxía: del llatín FŬNDUM [fúndum]
‘fondu, parte fondera de daqué’. El sufixu -
ón vien del llatín -ŌNEM [-ónem].
●Documentación histórica del topónimu: nel
diccionariu xeográficu de Madoz (1845-50)
cítase como «Joudon», de xuru que por
una confusión tipográfica ente la «n» y la
«u». Nun sabemos si la «j» ye frutu d’otra
consufión, o si reflexa una vieya
pronunciación de «hache aspirada».
●Otres observaciones sobre’l nome: nel
nome anteriormente oficial, «Fondón»,
eliminábase l’artículu ensin nenguna
xustificación.
Fonfría
Llugar de la parroquia de L’Abadía Cenero,
barriu de Trubia.
●Formación del topónimu: nun ye palabra
d’usu común na llingua, anque ye fácil
reconocer los dos componentes d’esti
topónimu compuestu: el sustantivu
asturianu fonte, apocopáu primero en font-
y depués en fon-; y fría, forma femenina
del axetivu fríu -a -o. Significa, polo tanto,
‘fonte fría’.
●Etimoloxía: fonte vien del llatín FŎNTEM,
d’igual significáu. L’axetivu fríu -a -o vien
del llatín FRĪGĬDUM -AM -UM [fríguidum], del
mesmu significáu.
●Referencia al llugar: el llavaderu y la fonte
actuales ficiéronse nel añu 1904.
●Documentación histórica del topónimu:
nun documentu del Monesteriu de San
Vicente d’Uviéu-1, del añu 1144, dizse: «et
per termino de Frexno, et de Fonte
Frida…».
FONTACIERA
Barriu de la parroquia de La Pedrera.
Códigu alministrativu: 24.15.02. Nome
oficial anterior: «Fontaciera».
●Formación del topónimu: topónimu que
nun funciona como apelativu normal de la
fala, anque ye posible reconocer nél un
primer elementu font-, apócope de fonte;
l’otru elementu, -aciera, que nun se
reconoz como palabra del idioma actual.
●Etimoloxía: fonte vien del llatín FŎNTEM,
d’igual significáu. Pal elementu -aciera, pue
atribuíse-y un orixe nel axetivu llatín
ACIDARĬAM [akidáriam], un deriváu de ACĬDUM
[ákidum] ‘acedu, ácidu, agriu’; d’aende
saldría l’axetivu acedera (el nome d’una
planta tien esi aniciu), y la evolución
fonética llevaríalo a *aceera y llueu a
aciera. En resultes, Fontaciera remonta a
*Fonte Acedera, col significáu de ‘fonte
aceda o ácida, agria’. D’acordies con otra
hipótesis, podría orixinase más bien na
espresión Fonte Acebera, ye dicir, ‘fonte del
acebu, fonte con acebu’; acebu vien del
llatín vulgar *ACĬFUM [akífum], alteración del
clásicu AQUIFŎLĬUM [akuifólium].
●Documentación histórica del topónimu:
«Sepant quantos esta carta de partida
vieren commo yo, Alffonso Rodriguiz, et yo,
Diego Garçia, moradores en Arroyo, que es
termino del conçello de Gigion, partidores
que somos de los heredamientos e lantados
que foron e fincaron de Alvar Rodriguiz de
Bateado, e de Orraca Perez de Arroyo, que
ellos avian en Arroyo e en Fontaziera et en
Effollada e en la heria de Cueto et so la
canpana de Santo Andres de la Pedreda e
en sos terminos», «Roy Perez de
Fontazera» (Monesteriu de San Pelayo
d’Uviéu, añu 1399). Los Protocolos
Notariales del Conceyu de Xixón, añu 1744,
citen: «Matheo Gonzalez Tejuga, vecino de
el lugar de Fontaciera, feligresia de La
Pedreda de este dicho concejo». El Catastro
del Marqués de la Ensenada (1752) cita esti
topónimu de delles maneres distintes, de
xuru que por errores de trescripción: «Otro
[molín] en el Lugar de Fontaziena Parrochia
de la Pedrera» […] «Otro en dicho Lugar de
Fontaziella…»; «Otro [molín] En termº de
dha Abadia de Zenero de dos Molares que
muelen con Agua de el Rio de
Fontaciera…»; «Linda al oriente río de
86