Diccionariu toponímicu del conceyu de Xixón _bicolor_ - El Comercio

Diccionariu toponímicu del Conceyu de Xixón
del sustantivu llatín MŌREM ‘vezu, costume’,
n’alusión a tierres del común, sometíes al
usu de los vezos de la comunidá. Seya
como fuere, *moría tuvo que tener un
antecedente *moriya, de manera que la
espresión directamente orixinaria sería
*MORĪLĬA [morília] o *MORĪCŬLA [moríkula].
Les formes *moriya y *moría amuesen la
mesma desapaición de -y- qu’atopamos nel
actual asturianu fiyu o fíu. Moriyón, polo
tanto, provendría d’un aumentativu de
*moriya col sufixu -ón, del llatín -ŌNEM.
El Mortero
Llugar del distritu Oeste, parroquia urbana
de Tremañes, barriu de Les Maravilles.
●Formación del topónimu: atopamos equí’l
sustantivu asturianu morteru ‘furacu nuna
peña o nun cantu onde para l’agua de
llover’, en relación cola fonte qu’hai nel
llugar; ye frecuente na Asturies central
qu’un sustantivu acabáu en -u tome una -o
al quedar fixáu como topónimu. Nun se pue
descartar que morteru se pueda entender
tamién como una variante del asturianu
mortera ‘estensión de terrenos comunales
de pastu con una reglamentación propia pal
usu de los vecinos’, ‘estensión de praos o
de campes de propiedá privada con
determinaos usos comunales’. Una última
hipótesis apunta a un posible túmulu
funerariu, un significáu que s’asociaba
tamién a la palabra morteru, de muertu.
●Etimoloxía: en cualesquier de les tres
hipótesis mentaes, l’orixe taría nel axetivu
llatín MŎRTŬUM [mórtuum] ‘muertu’, col
sufixu -ĀRĬUM, que dio llugar al asturianu -
eru. Si tien que ver con ‘agua’, aludiría a
‘agua estancao’, ye dicir, ‘muerto’. Si tien
que ver con terrenos comunales, aludiría al
fechu de qu’en determinaos periodos del
añu quedaríen acotaos y ensin esplotar, ye
dicir, ‘muertos’.
●Referencia al llugar: nel llugar d’El Mortero
ta La Fonte’l Morteru o La Fonte la Mortera;
cerca d’ella atopóse al pie de 1826 un altar
romanu dedicáu a la Fortuna Balnearis o
Fortuna Balnear, divinidá de los baños, por
un home llamáu Pompeius Peregrinarius. Ye
posible que nel llugar esistieren na
Antigüedá unes termes. Cerca del sitiu
atopóse tamién una llábana dedicada al
dios romanu Xúpiter.
MUNIELLO
134
Barriu de la parroquia de Puao. Códigu
alministrativu: 24.16.01. Nome oficial
anterior: «Muniello».
●Formación del topónimu: nun ye palabra
reconocible na fala asturiana actual, a nun
ser nel usu como topónimu. Solo ye a
reconocese’l sufixu diminutivu -iellu. Ye
corriente na Asturies central qu’un
sustantivu acabáu en -u quede fixáu con -o
si se convierte en topónimu.
●Etimoloxía: desconozse. La hipótesis más
convincente fai remontar esti topónimu a la
espresión prerromana *MUNN- o *MONN-, col
significáu de ‘bultu, protuberancia’, d’au
l’asturianu muñón o moyón ‘finxu, piedra
fincada en suelu cola que se marca la
llende d’una finca o d’un prau’ (en
castellanu «mojón, hito»). El sufixu
diminutivu -iellu provién del llatín -ĔLLUM [él
lum]. La forma d’esti topónimu debió ser
primeramente *Muñello, pero la presencia
de dos consonantes palatales na mesma
palabra («ñ» y «ll») pue facer qu’una
d’elles pierda esa característica; nesti casu,
la «ñ» convirtióse nuna secuencia «ni», de
la mesma manera que La Piñella
(Valdesoto, conceyu Siero) alterna na
pronunciación con La Piniella.
La Muria
Llugar del distritu Oeste, parroquia
periurbana de Tremañes, barriu de La
Picota.
●Formación del topónimu: alcontramos
nesti topónimu’l sustantivu asturianu muria
‘construcción allargada y alta, de munchu
grosor, fecha de piedres o lladriyos, que val
p’acotar o pa xebrar espacios’ (en
castellanu «muro, pared»), y tamién
‘moyón, piedra fincada en suelu que marca
la llende d’un prau o d’una propiedá’ (en
castellanu «mojón, hito»). Ver tamién La
Parea.
●Etimoloxía: muria, muriu y muru
provienen del llatín MŪRUM, col mesmu
significáu.
●Documentación histórica del topónimu:
nos mapes de los sieglos XVII y XVIII,
fechos na so gran parte por cartógrafos
estranxeros, suel apaecer el topónimu «la
Muria», allugáu nel suroeste del conceyu,