Diccionariu toponímicu del conceyu de Xixón _bicolor_ - El Comercio

Diccionariu toponímicu del Conceyu de Xixón
mentaes. Paeznos qu’asina esti diccionariu
cumple meyor el so oxetivu divulgador, y
eso nun ye inquiz pa que’l llector
especializáu pueda acudir a les obres
citaes si quier enanchar información. Pa
cabu, ciertes observaciones de Fernando
Álvarez-Balbuena García y de Xulio Viejo
Fernández, compañeros del Seminariu de
Filoloxía Asturiana y de la Xunta Asesora
de Toponimia, valiéronme bien na
esposición d’una serie d’etimoloxíes.
Pero convién aclarar que non siempre
se conoz la etimoloxía d’una palabra.
Cuando asocede eso, o polo menos nun
tenemos elementos pa facelo, o cuando
nos paeció arriesgao llanzar una hipótesis,
espresamos esa desconocencia,
aguardando disponer de más información.
Referencia al llugar
Esta información nun se pon en tolos
casos, y cuando se fai ye porque se xulgó
pertinente pa interpretar o completar
dellos aspectos alredor de la forma del
topónimu, la so formación o la so
etimoloxía, y tamién sobre la ubicación del
llugar. De toes maneres, cuando se faen
estes referencies, aprovéchase pa ofrecer
otros datos que puen ser prestosos pal
llector interesáu nos detalles de la historia
local.
Documentación histórica del
topónimu
Non siempre esiste documentación
histórica d’un determináu topónimu, o
polo menos non siempre tuvo al nuestru
algame nesta edición. En bien de casos, sí
ye posible conseñar tala documentación y
facer un percorríu peles diverses fases
qu’un topónimu foi teniendo a lo llargo de
la historia. Les fontes documentales d’au
tán sacaes les cites toponímiques antigües
indíquense con una referencia que se pue
atopar, destacada en lletra negro, na
sección «Bibliografía, referencies y
símbolos», al final del llibru.
Hai un principu básicu de los fechos
llingüísticos: les palabres cambien col
tiempu. Los topónimos tamién. Esa
constatación escapa davezu al saber
popular, onde hai l’enclín a pensar que les
palabres percuerren inmutables los sieglos.
Verdaderamente, lo que sabemos ye que
les palabres comunes y los topónimos, en
dos mil años, sufren alteraciones
fonétiques de diversa mena. Nunos casos
les alteraciones fonétiques nun son mui
fondes, y la palabra permanez
reconocible. Pero n’otros casos, la
diferencia ente la forma orixinaria (Pandu
Grande) y l’actual (Pangrán o Pancrán) ye
tanta, que solamente un especialista ye a
descubrir la relación ente una y otra. Por
eso, tener testimonios de la forma o
formes que tenía un topónimu na Edá
Media, ye una información ye pervaliosa,
porque desanicia munches dudes.
Nesti apartáu allugamos les
referencies antigües ente comines,
poniendo en cursiva’l topónimu, con una
referencia del documentu onde vien
conseñáu y l’añu. Agora bien, equí de
nuevo fai falta aclarar al non especialista
que les apariencies engañen tamién. Lo
que vemos escrito na grafía medieval nun
equival a lo que güei pronunciaríemos. Por
exemplu, lo qu’apaez escrito como Cenero
nel añu 1334 pronunciábase en realidá
[tsenéro], y el Gigion del añu 1151
pronunciábase como [ZiZión], esto ye, con
una «j» como la del francés o del catalán,
y non como l’actual «j» del castellanu,
siendo en realidá una pronunciación mui
cercana al actual Xixón del asturianu. Y al
revés: el Lauandera que se llee nun
documentu del añu 1182, o’l Nataollo del
añu 1281, pronunciábense esactamente
como’l Llavandera o’l Natahoyo de los
nuestros díes.
Asina entós, ye un error lleer les
grafíes medievales como si tuvieren
escrites na llingua actual. Hai que tener en
cuenta dos coses: la llingua medieval tenía
pronunciaciones diferentes a les actuales;
y na Edá Media nun esistía regularización
na escritura (nun había normes
ortográfiques), lo que produz gran
variabilidá gráfica según los casos, y
mesmamente dientro d’un mesmu escritu.
De toes maneres, conozse con bastante
traza cómo se pronunciaba l’asturianu na
Edá Media (ver «Orientaciones pa la
pronunciación de les palabres asturianes
medievales», al final del llibru).
Amás, ye enforma importante señalar
que na Edá Media asturiana usáronse dos
llingües pa redactar los documentos. Per
un llau, el romance faláu, que nel casu
d’Asturies yera mayormente l’asturianu
medieval; per otru llau, el llatín, una
llingua que yá nun se falaba, y que
12