Diccionariu toponímicu del conceyu de Xixón _bicolor_ - El Comercio

Diccionariu toponímicu del Conceyu de Xixón
ocupando los praos que güei
correspuenden a una porción del actual
barriu de Pumarín, más o menos lo que
güei ye Les Mil Quinientes. De fechu, esti
grupu de viviendes construyóse enriba d’un
conxuntu de finques llamaes xenéricamente
«Coto de Montevil y Pumarín», propiedá
hasta 1940 del Conde de Revillagigedo. Esi
desplazamientu xeográficu reproduzse años
depués; asina, los rexistros oficiales sobre
los terrenos onde s’edificó La Urgisa (años
40) y Les Mil Quinientes (años 50 y 60)
falaben de «Montevil, barrio de Pumarín»,
lo que paez espurrir Montevil mui al norte.
El modernu barriu de Montevil, nacíu a
partir de 1996, espúrrese dende Nuevo
Gijón / La Peral hasta Contrueces y Roces,
y correspuende «grosso modo» col llugar
históricu. Ver Pumarín.
●Documentación histórica del topónimu: el
Llibru Ordinariu fai estes menciones al
topónimu: «Y estando ansi juntos dixeron
que sobre el pleito questa villa e conçejo
trata con Alonso Ramirez de Jove sobre los
montes del Corbiello e Montebil y otras
partes», «el pleito que esta villa e concejo
trata con Alonso Ramirez de Jove, regidor,
sobre los montes del Corbiello, y Montebil,
y otras partes» (añu 1576). El Catastro del
Marqués de la Ensenada (1752) cita «en el
término de Montevil». Nos Apeos de la Casa
de Cornellana (1757) lléese: «las brañas e
montes de Montevile que su propiedad es
del dicho Don Alfonso…»; hai referencies a
«prados de Montevil» o «llosa de
Montevil». Xovellanos (Diariu, añu 1794)
falaba de «el monte de Montevil». Tiense
rexistrao Monte Vil en planos como’l de
Javier Sanz (1900) o’l de Ricardo Casielles
(1910); «Arroyo de Monte Vil» ye’l nome
que nesti mapa recibe un regueru que baxa
de Contrueces, pasando pela zona d’ente’l
cementeriu Ciares y l’actual avenida
Schulz 31 .
31 Les Cases de los Maestros, n’El
Llano del Medio, construyéronse en 1952
nunos terrenos llamaos La Llosa del Río, lo
que quiciabes pue tener relación con esi
«Arroyo de Monte Vil».
MONTIANA
132
Barriu de la parroquia de Fresno. Códigu
alministrativu: 24.08.02. Nome oficial
anterior: «Monteana».
●Formación del topónimu: nun ye palabra
reconocible nel asturianu actual fuera del
usu como topónimu.
●Etimoloxía: desconozse de ciertes. Hai, en
primeres, una cuestión que convién
desentrellizar pa pescudar l’orixe d’esti
topónimu, y ye la siguiente: si la forma
antigua yera yá Montiana, siendo entós
Monteana una simple castellanización, del
estilu de la que convirtió l’históricu y
auténticu Ciares nel modernu y falsamente
cultista «Ceares»; o bien si la forma
asturiana antigua yera en realidá Monteana,
que se caltuvo asina na llingua escrita,
evolucionando na llingua falada a Montiana
(igual que l’antiguu «Bateado» evolucionó
al actual Batiao). Los testimonios históricos
polo menos dende’l sieglu XVI amuesen
una forma «Monteana», lo que pudiere ser
niciu de qu’esta ye la forma más antigua.
Nesti casu, la hipótesis etimolóxica
apuntaría a un nome d’home MONTĒIUS
[montéyus] ‘Monteyo’, y la espresión de la
qu’habría que partir sería *MONTĒIĀNAM
[monteyánam], encurtiamientu de VĪLLAM o
TĔRRAM MONTĒIĀNAM ‘la finca o tierra de
Monteyo’, d’au resultaría l’asturianu
medieval *Monteyana, llueu *Monteana,
hasta desembocar nel actual Montiana. De
toes maneres, si la forma más antigua
fuere «Montiana», sería meyor hipótesis
basase na espresión llatina *MŎNTĪLĬĀNAM
[montiliánam], encurtiamientu de VĪLLAM o
TĔRRAM MŎNTĪLĬĀNAM ‘la finca o tierra de
Montilio’, siendo un deriváu del nome
d’home MŎNTĪLĬUS ‘Montilio’, supuestu amu
d’una propiedá; y asina, la forma asturiana
en primeres sería *Montiyana, con una
evolución fonética regular dafechu, pues la
secuencia llatina -LI- da como resultáu
n’asturianu una -y-, igual que MŬLIĔREM o
FŎLĬA dan como resultáu muyer y fueya.
Depués, la -y- ente vocales desapaecería,
como ocurre dacuando na llingua moderna,
onde’l llatín FĪLĬUM dio llugar a fiyu o fíu.
Nun se pue descartar, pa cabu, un orixe nel
llatín *MŎNTĬCŬLĀNAM [montikulánam],
deriváu de MŎNTĬCŬLUS [montíkulus]
‘montiquín, monte pequeñu’.