versione pdf - Sardegna DigitalLibrary

Prefatzione 15
• In cale relassione s’accattat s’aspettu modernu de su sardu in cuffrontu
a sa gai nada “arcaitzitade”?
• A si podet cussiderare sa LSU una solutzione bona pro sa codificatzione
de su sardu?
• Cale cuntributu podet dare sa linguìstica, fintzas usande sa tecnolozia
moderna de informatzione?
Semus cuntentos de poder presentare chin custu volume bell ’e tottu sos cuntributos
ispostos in su cumbènniu. Sicunde sos obiettivos chi amus fentomau
in susu, si trattat de dare unu panorama de sos istùdios de limba sarda cuntzentraos
supra de aspettos de “modernidade”, chentza peroe perder de bista
sa traditzione filolòzica e sas caratterìsticas particulares de su sardu. Pro su chi
pertoccat sos temas, su volume si organizzat tando in battor partes: sa chistione
de s’arcaitzitade, su probrema de s’istandardizzatzione, s’appricu de sos
mèdios nobos de informatzione e s’aspettu europeu.
In sa setzione prima (S’arcaitzitade de su sardu) amus a faveddare de unu
de sos temas d’investigatzione prus traditzionales de sa filolozia sarda. Su
pessu chi su sardu siat una limba arcàica, o fintzas sa prus arcàica tra sas limbas
romànicas, rappresentat unu “Leitmotiv” in s’istòria de sa linguìstica romànica
e sarda. Mancari cust’ipòtesi siat istada disputada charchi borta, su
libru nostru bi si dèdicat pro sa prima borta in manera sistemàtica. S’artìculu
de GUIDO MENSCHING introduchet custa setzione chin su tìtulu provocadore
“Su sardu – limba arcàica o limba moderna?”, in ube, appustis de aer illustrau
paritzas definissiones de su tèrmine “arcaitzitade”, esàminat sos campos divressos
de investigatzione de su sistema linguìsticu sardu (fonolozia, morfolozia,
sintassi e lèssicu) pro nde accattare urminas d’arcaitzitade. Comente risurtau
podimus ja narrer innoche chi, mancari siat beru chi su sardu (mascamente
in su lèssicu) jucat elementos chi si poden cramare “arcàicos” o mezus
“cusserbadores”, sas inobassiones sun prus numerosas. Sos àtteros duos artìculos
de custa setzione si cuntzentran supra de unu livellu solu de s’istùdiu
linguìsticu, ma in fundu. De sa fonolozia nde faveddat THOMAS KREFELD chin
s’artìculu suo “Un mito da smontare: l’arcaicità del vocalismo sardo”, in ube –
ponende a pare su sistema vocàlicu sardu e sos sistemas vocàlicos de paritzos
dialettos de s’Itàlia meridionale – mustrat su chi su tìtulu programmàticu ja
nos fachet suspettare, est a narrer chi nessi in s’àrea de sa fonolozia, e prus
esattamente in su vocalismu, s’arcaitzitade de su sardu bisonzat a la cussiderare
una lezzenda. Sichit PETER KOCH chi in s’artìculu “Il cosiddetto ‘conservatorismo’
lessicale del sardo” analizzat unu campu chi in pràtica fit abbarrau
chentza isprorare fintzas a commo: sa semàntica. Tuccande siat dae su puntu
de bista semasiolòzicu siat dae cuddu onomasiolòzicu, Koch cuffrontat s’assi-