versione pdf - Sardegna DigitalLibrary

48 Guido Mensching
5. Cuncruimentu
In cust’artìculu appo chircau de risponder a sa dimanda diffìtzile si su sardu
est una limba arcàica o nono. In sa setzione 2 amus esaminau sas paràgulas
chi Max Leopold Wagner aiat crèttiu de orìzine latina antica, de un’època pacu
appustis de sa cunchista romana. Su risurtau est chi tottu cussas paràgulas
si fin usadas in sa limba latina fintzas a s’edade imperiale. Gaichì, s’arcaitzitade
supposta de su sardu non si podet riferire a su latinu anticu. Sa limba sarda
derivat dae su latinu faveddadu in sos sèculos I, II e III appustis de Cristu.
Gaichì, un’arcaismu podet esser un’elementu de cudd’època chi su sardu at
cusserbau bene, siat ca s’est pèrdiu atterube (pro es. mannu), siat ca s’assimizat
galu prus a s’elementu orizinale latinu che in àtteras limbas (pro es. facher).
Mancari diat esser mezus, fortzis, a usare pro custos elementos su tèrmine
cusserbadorismos (accontzau dae s’ispagnolu), podimus puru continuare
a los cramare arcaismos, in accordu chin sa traditzione de sa filolozia sarda. In
sa setzione 3, appo chircau de istabilire in cale oru de su limbazu s’accattan
custos elementos arcàicos: non los podimus addobiare ne in sa fonolozia, ne in
sa sintassi, e in s’àrea de sa morfolozia nd’imbenimus pacos pacos (mascamente
sa terminatzione verbale -t, e fortzis cudda nominale -us). Imbetzes, su
locu in ube accatamus unu nùmeru prus a prestu mannu de arcaismos est su
lèssicu, e amus puru bidu chi partitzos elementos chi sa traditzione filolòzica
at chèrfiu attribuire a sa fonolozìa e a sa morfolozìa sun, in realidade, caratterìsticas
lessicales, supra de tottu s’immàzine fònica de sas paràgulas. Dae s’àttera
banda, sa limba sarda contenet unu nùmeru mannu de innobassiones. In
prus, s’arcaitzitade lessicale de su sardu toccat prus a prestu sa calidade, ma
non sa cantidade: sos esames numèricos chi si sun fattos fintzas a commo indittan
chi b’esistin àtteras limbas chin unu nùmeru prus mannu de arcaismos.
Ma est beru chi sa calidade de paritzas paràgulas podet esser prus arcàica o
cusserbadora che in àtteras limbas, ca s’assimizu fònicu de una paràgula comente
/fak´r/ chin sa radichina latina est prus forte che in sas paràgulas chi li
corrisponden in italianu, frantzesu, ispagnolu etz. (/far´/, /f´:r/, /a†er/). E de
custu, pesso chi si nde fit abbizau fintzas Dante…