vipaji_pages1-100

Udhalilishaji
Mdhalilishaji ni mtu anayezua mambo ya uongo kwa nia ya
kuharibu heshima na hadhi za wengine hadharani. Mdhalilishaji
huzalisha kashfa ili kuharibu maisha ya wengine.
“Basi wekeni mbali uovu wote na hila yote, na unafiki na
husuda na masingizio yote.” (1 Pet. 2:1)
Madhara Ya Kulalamika Na Kuhukumu Wengine
Hudhoofisha Ubunifu Wa Kipaji
Mwathirika wa mtazamo hasi wa kulalamika na kuhukumu
hukiathiri kipaji chake cha asili kwa kudhoofisha uwezo wake wa
asili wa kubuni mambo mapya. Kumbuka ya kwamba utendaji wa
kipaji unategemea nguvu za ubunifu wa mambo mapya. Na nguvu
za ubunifu hutokana na mawazo chanya.
Kimaumbile “mawazo hasi” hayawezi kutenda kazi kwa
wakati mmoja na “mawazo chanya”. Kila kimoja kinafanya kazi
kwa wakati wake kinapokuwa kimepewa nafasi ya kwanza. Kwa
hiyo, “mawazo hasi” huamsha “hisia hasi” ambazo huwa kikwazo
cha utendaji wa mawazo chanya. Wakati mwathirika wa mtazamo
hasi hutumia mawazo hasi na kughubikwa na hisia hasi; hali hiyo
huzuia upande wa pili wa mawazo chanya na hisia chanya kufanya
kazi kwa wakati mmoja.
Changamoto iliyopo hapa ni kwamba, muda wote ambapo
mawazo hasi, na hisia hasi vinatenda kazi ndani ya mwathirika,
kipaji chake kinakuwa kimefungiwa ule uwezo wake wa kutenda
kazi yenye tija kwa muhusika. Kwa hiyo, muda mwingi unaopotea
kwenye kulalamika na kuhukumu wengine, mambo yake
mwenyewe husimama au kukwama.
61