vipaji_pages1-100

alicho nacho atanyang’anywa.” (Mat. 25:24-29)
Katika maandiko haya tunasoma maneno haya “… Wewe
mtumwa mbaya na mlegevu.” Unaona? Anatajwa moja kwa
moja ya kuwa kilichomfanya akashindwa kutumia kipaji chake ni
ulegevu wake mwenyewe na madhara yake ni kunyang’anywa
hata hicho alichokuwa nacho.
Tabia Sugu Ya Ulevi Na Madawa Ya Kulevya
Miaka 3,000 iliyopita kabla ya elimu ya sayansi kuwepo,
manabii walitoa maonyo kuhusu matumizi ya pombe wakisema
athari zake ni pamoja na kuharibu fahamu za wanadamu:
“Uzinzi na divai mpya huondoa fahamu za wanadamu.”
(Hos. 4:11)
Maandiko haya yanathibitisha kwamba pombe ina athari
kubwa kwa kipaji cha binadamu kwa kuwa inadhoofisha uwezo
wa kufikiri. Kwa mantiki hii divai mpya inajumuisha kila kitu
kinacholewesha ikiwemo uvutaji wa bangi; matumizi ya dawa za
kulevya unaojumuisha unga wa kubugia, kunusa, au uchomaji
sindano.
Maandiko matakatifu, kama jina lake lilivyo, yameandika
waziwazi ya kwamba ndani ya pombe mna sumu inayoharibu
tabia ya mtu na kumwondolea ubinadamu wake na kufanya awe
kama hayawani:
“Tena msilewe kwa mvinyo, ambamo mna ufisadi; bali
mjazwe Roho.” (Efe.5:18)
Neno “ufisadi” katika maandiko haya linamaanisha “uchafu
uliokithiri”. Huu si uchafu wa mwili bali vitendo haramu visivyo vya
kimaadili. Ndiyo maana nimeorodhesha ulevi kuwa ni “tabia sugu”
inayoharibu utendaji wa vipaji ndani ya binadamu.
66