Portret Magazine No 31

Го создадовте Chloe Nomade, инспириран од жените, авантуристки кои уживаат да откриваат нови
хоризонти во сопствениот живот. Што е слободата за вас и кога сте биле најблиску до неа?
За мене, слободата има огромно значење, и како поединец и кога работам и сум дел од некој колектив.
Имам изразено многу силно чувство за слобода во секој аспект од моето живеење и сега веќе не
можам да функционирам никако поинаку. Во првиот момент кога ќе почувствувам дека на кој било
начин мојата слобода е загрозена, веднаш имам потреба да се тргнам од приказната и да заминам
на друго место, каде што ќе можам да бидам целосно слободен. Всушност, многу години сум во
постојана потрага по слобода и верувам дека таков ќе останам засекогаш. Особено што сфатив дека
мојата креативност најдобро функционира во таа сосема слободна состојба на телото, духот и умот.
За многу жени ништо подобро не буди спомени на личности и места од парфем. На што мириса
жената што го користи Chloe Nomade?
Мојата идеја, кога почнав да работам на Nomade, беше да создадам парфем што ќе може да го користи
секоја жена и што кај неа ќе ги буди нејзините најскриени чувства за нови авантури. Сакав секоја
различна жена да „го носи“ парфемот на различен начин, во комбинација со мирисот на сопствената
кожа. Како кога патуваш со некого и откриваш различни места, двајцата ги доживувате исти работи,
места и случки, на различен начин. Па, така, сакав секоја жена на свој начин да го доживее искуството
Nomade, во комбинација со нејзиниот личен печат. Вака го замислував додека работев на него, но
откако имав можност да ја запознам актерката Ариене Лабед, која е заштитно лице на овој парфем и
со која што веднаш се пронајдовме и препознавме еден во друг слични енергии, сега кога мислам на
Nomade мислам на неа. Првиот работен наслов на парфемот беше „Бегство“ и водечкиот мотив ми
беше дека секоја жена заслужува шанса одново да се пронајде себеси. Иако имаше забелешки дека
има некоја машка нота, што му дава „унисекс“ момент, сепак го сметам за исклучително женствен,
вистинска верзија на денешната жена, силен и возбудлив.
Ако судиме по дизајнот на шишето, Nomade е парфем за елегантни жени, со слободен дух, кои знаат
што сакаат. Факт е дека секоја современа жена се стреми да биде токму таква, па сметате ли дека
овој парфем има потенцијален да стане култен?
Според мене, постојат неколку работи што ги поседуваат сите „култни“ парфеми. Првата работа
секако е моќноста на парфемот, и тоа изразена низ две работи, долготрајноста и трагата што ја
остава. Исто така мора да биде препознатлив, мора да стои долго и да станува пријатен кога ќе почне
да се менува во комбинација со кожа. Овие елементи, во комбинација со маркетингот и брендот, на
крајот даваат парфем што луѓето го користат со години и со кој се врзуваат емотивно.
Парфумерите наоѓаат инспирација за својата работа во различни делови од секојдневието. Кои
мириси оставиле најсилен впечаток кај вас и имате ли некој мирис што ви пречи?
Па, повеќе моите пријатели имаат проблем со мојот „нос“, затоа што имам исклучително чувствителен
нос, што навистина може да биде вистинска непријатност во секојдневниот живот. Можеби ќе звучи
смешно, но постојано имам проблем и многу често ми мириса на „мокро куче“ и тој мирис навистина
ми пречи. Исто така, не можам да го поднесам мирисот што го оставаат мандарините на моите раце,
по лупењето.
Имате професија што ви дава можност да ја покажете целата своја креативност и својот талент. Што
треба да поседува секој што сака да стане врвен парфумер?
Од мојот случај може да се заклучи дека за секое правило може да има отстапка. Но, да се
разбереме, таа отстапка носи голема одговорност. Можеби не сум хемичар, но мојата посветеност
и фокусираност, мојот пристап ми овозможиле да постигнам успех. Значи, прво и основно, како
и во секоја работа мора да постои голема љубов, страст и посветеност. За парфумер важно е да
поседуваш трпеливост како карактерна особина и, секако, да имаш визија и вредно да работиш на
неа.
59