Portret Magazine No 31

Ч А С О В И З А П И Е Њ Е В И Н О
ПЕНЛИВИ ВИНА
На пиедесталот на секоја свеченост
За пенливите вина, нивното добивање, карактеристики и начинот на консумација
поразговаравме со м-р Петар Петров, асистент на Универзитетот МИТ – Скопје, при Факултетот
за менаџмент на еколошки ресурси, катедра за безбедност на храна.
ШАМПАЊОТ – СИНОНИМ ЗА ПЕНЛИВИ ВИНА
Производството на пенливи вина почнало уште во XVII век, а два века подоцна шампањот
станува синоним за пенливи вина.
Иако производството на пенливи вина е во постојан раст и се стреми кон постигнување
на униформен квалитет, сепак досегашните произведени пенливи вина многу варираат во
квалитетот, карактерот и стилот.
На пазарот поим за квалитетно пенливо вино е францускиот шампањ, кој води потекло од
најсеверниот француски вински регион Шампањ. Неговото производство е имитирано речиси
низ целиот свет.
СУВИ ВИНА СО ПОЛН ВКУС
Добриот и квалитетен шампањ секогаш се одликува со фина структура, најчесто е сув со полн
вкус што личи на потпечен двопек, кремави ароми и е многу освежителен. Овие благодатни
својства шампањот го ставаат на пиедесталот на секоја свеченост.
Другите пенливи вина варираат од блиски натпреварувачи со шампањот, направени од исто
грозје и иста технолошка постапка, па до вина што се поблиску до пенливите пијалаци, полни
со јаглеродни меурчиња, понекогаш овошни ароми, па и без вкус. Сепак, мора да се истакне
дека оригиналното благородно буке на шампањот е условено токму од климатските услови во
производниот реон.
ДВА ВИДА ПЕНЛИВИ ВИНА
Во зависност од квалитетните својства, генерално пенливите вина се поделени во две групи:
• Лесни, суви пенливи вина;
• Пенливи вина со долготраен вкус, најфини ароми и јасен стил.
Пенливите вина од првата група го истакнуваат регионалниот идентитет и индивидуалноста.
Најголем дел се произведени од грозје со понеутрален вкус од шампањот, па затоа се
одликуваат и со помала киселост. Овие вина се многу освежителни и најчесто се консумираат
како млади вина послужени на многу ниски температури.
Вината од втората група претставуваат сериозни конкуренти на изворниот шампањ. Како млади
вина се со благо помеки својства од класичниот шампањ, но со нивно соодветно дозревање во
шише стануваат речиси идентични на шампањот.
Пенливите вина најчесто се сервираат без присуство на храна, а исто така можат да се
комбинираат и со лесни предјадења, како и со овошни и зеленчукови салати.
80