5- orações da sapiência

2 8 6 JERÓNIMO DE BRITO
His ergo armis si utamur, optimi Patres, et remedia adhibeamus
Satanaeque incursibus [C vº] reluctemur, consumabitur temptatio, praesto
aderunt angeli suppetias uenient, accedent et ministrabunt nobis, suffragio,
praesidio ac patrocinio erunt. Deumque, quem demeritis et peccatis ad
iram prouocauimus ac uindictam, placabunt precibus sedabuntque, pium,
benignum ac clementem reddent. Auertentque eius gladium iamiam
ceruicibus nostris interitum, ut “post tempestatem tranquillum faciat et
post tribulationem mittat consolationem.” [Tob 3. 22] Concilio, ministrabunt
consilium, sapientiam ac prudentiam, conciliabuntque fauorem et gratiam
ut cuncta prospere, fauste feliciterque succedant et pro uotis fidelium.
Haeretici, dolis et imposturis diaboli seducti, ad Christi ouile, ad Ecclesiam
Romanam, quae mater, doctrix ac magistra est omnium ecclesiarum, cui
omnes caput inclinant, summa concordia reducantur. Iura resarciantur
uetera, noua salubria sanciantur; abusis, si qui sunt, radicitus euellantur. Vt
hoc saluberrimo oecumenico Concilio, tot tantorumque antistitum, multis
nominibus colendorum, illustrium, sanctorum doctorumque uirorum digna
praesentia frequente, [Cii] quo augustius in terris nihil aut diuinius inueniri
potest, feliciter absoluto, diu ab omnibus exoptata pace, concordia, unione,
foedere et caritate, diuina suppeditante clementia perfruamur.
Dixi
FINIS
Auctoritate reuerendissimi inquisitoris Brixiae impressa est.