2016-02

Mundart
Wat wär dat schöar, wennet annersch wär,
on se däten sech ab on zo moa böcke.
Doch go moal russ e de Natur,
do häsde noch Erotik pur!
Do triebdet dr Belles met dr Koh,
im Burnshof dr Gickel met dm Hoh,
on fährsde eed Wittjestäemerland,
da kömmsde a ne rechtije Peepshow-Wand!
Döscher Aue on Berchhuse
doo noch ganz annem Kaliber schmuse.
Do kaasde gucke on och höern,
wie bim Prenz Rechard de Hirsche röhrn.
Bi oos drheim war alles zöchtich,
de Kenner flissich, de Ellem döchtich.
„Ora et labora“ hees de Devise,
met Erotik, do woarsde schnell ee de Miese.
Wie ooverfälscht det Läewe em Sejerland woar,
dat wird ennem Schnürielche vam Thomasse Luis kloar:
Denn droaf sin Dokter moal op dr Stroas,
met wissem Gesecht, on rorer Noas.
„Herr Dokter, ech fenne des Nachts kenn Roh.
Min isskaale Föß setze mr waane zoo.“
Do sähde dr Dokter:“ Dat es doch kenn Sache.
Ech wiss, wat ech eh sonem Fall mache.
Ech doo min Baai nur zr Sidde strecke,
zo minner Frau, onner de warme Decke.“
„Dat esset, reef Luis, ech wohn jo net witt,
wann hätt da eare Frau mo Zitt?“
Nää, warre Gedäh ! !
Koppirait bei Päule Heck
Oh, nass is ...
Düsdere Wolke, wennich Sonn,
et räänt als wenn de Sintflut köam,
oh , nass is ...
Köhl es et och, mr söcht am Jipp,
oh nass is ....
Min Frou söcht ah dr Wärmefläsche,
ech ah nem heiße Grog,
oh nass is ...
Et heißt, dat wör e Dörchschnettsjohr,
dröm wör dat net fatal,
ech setze stell vör nem Glas Bier,
stelln fest: et es egal,
dä Rä va dusse, dat Bier va enne:
oh nass is ....
Oder für einen „normalen“ Sommer
Mittsommernacht
Lila on wiss si de Duffeln am blöh›
eh lauwarmer Nacht süt mr Glöhwörmcher zeh›.
Jeheimnisvoll löchde on danze de Fonke,
si stell moal, hörscht de dn Gloggefrosch ongke?
Dr Vollmoand hüllt alles eh selwerich Lecht,
am Hollernbosch soaß hö e ganz kleiner Wicht,
als Könich eh hiddär Zaubernacht,
bes de Sonn werrer obgiert bet all ärer Pracht.
De Onke verstumme etz, fort es min Wicht,
leis murmelt de Quelle är Morjesjedecht.
Bruno Flender
2/2016 durchblick 31