GJUHE SHQIPE 1-9 perfundimtare - IZHA

5
Gjuha shqipe dhe Letërsia zhvillohen të integruara nga klasa e parë deri në klasën e
gjashtë. Ky integrim gjallon për vetë natyrën e ekzistencës së letërsisë si art i fjalës, në sajë të
gjuhës. Në këtë mënyrë janë të zhvilluara edhe kurrikulat e gjuhëve amtare në një sërë vendesh
europiane.
Në klasat 7-9, fusha e Gjuhës shqipe dhe Letërsisë organizohet në dy lëndë: Gjuhë
shqipe dhe Letërsi. Programi i Gjuhës shqipe do të zhvillohet sërish përmes 5 linjave: të
lexuarit, të shkruarit, të dëgjuarit, të folurit dhe njohuri rreth sistemit gjuhësor. Ndryshimi është
se teksti letrar në këto klasa është në përqindje të vogël (20%), në raport me tekstet joletrare dhe
do të jetë në funksion të studimit të gjuhës, për çështje të tilla: si nuancat gjuhësore, zgjedhja e
fjalëve, krahasimet me tekstet joletrare etj. Teksti letrar do të studiohet gjerësisht për qëllime
letrare dhe estetike në lëndën e letërsisë në klasat 7-9.
Ky program ka të njëjtat linja si dhe programi e mëparshëm. Ato janë: të lexuarit, të
shkruarit, të folurit, të dëgjuarit, njohuri rreth sistemit gjuhësor. Në ndryshim nga programi i
mëparshëm, këtu linja e të dëgjuarit dhe të folurit kanë secila nënlinjat dhe objektivat e veta.
Ndërsa linjat janë të njëjta, nënlinjat ndryshojnë.
Programi synon të përmirësojë edhe raportin njohuri/përpunim njohurish. Ky raport në
programin e ri është 60- 70% njohuri me 30 -40 % përpunim njohurish.
Në lidhje me ngarkesën konceptuale, theksojmë që janë shmangur përsëritjet e
panevojshme të disa koncepteve vit pas viti. Po kështu, nuk janë përfshirë në program disa
njohuri që paraqesin vështirësi për zhvillimin dhe karakteristikat e moshës së nxënësve dhe që
nuk cenojnë formimin gjuhësor të tyre.
Programi lëndor do të shoqërohet edhe me një udhëzues kurrikular që do të jetë
material ndihmës për mësuesit e gjuhës shqipe dhe për autorët e teksteve.
GJUHË SHQIPE