1.001.01a agním īḻe puróhitaṃ yajñásya devám ṛtvíjam - Linguistics

1.018.07a yásmād ṛté ná sídhyati yajñó vipaścítaś caná |
1.018.07c sá dhīnā́ṃ yógam invati ‖
1.018.08a ā́d ṛdhnoti havíṣkṛtim prā́ñcaṃ kṛṇoty adhvarám |
1.018.08c hótrā devéṣu gachati ‖
1.018.09a nárāśáṃsaṃ sudhṛ́ṣṭamam ápaśyaṃ sapráthastamam |
1.018.09c divó ná sádmamakhasam ‖
1.019.01a práti tyáṃ cā́rum adhvaráṃ gopīthā́ya prá hūyase |
1.019.01c marúdbhir agna ā́ gahi ‖
1.019.02a nahí devó ná mártyo mahás táva krátum paráḥ |
1.019.02c marúdbhir agna ā́ gahi ‖
1.019.03a yé mahó rájaso vidúr víśve devā́so adrúhaḥ |
1.019.03c marúdbhir agna ā́ gahi ‖
1.019.04a yá ugrā́ arkám ānṛcúr ánādhṛṣṭāsa ójasā |
1.019.04c marúdbhir agna ā́ gahi ‖
1.019.05a yé śubhrā́ ghorávarpasaḥ sukṣatrā́so riśā́dasaḥ |
1.019.05c marúdbhir agna ā́ gahi ‖
1.019.06a yé nā́kasyā́dhi rocané diví devā́sa ā́sate |
1.019.06c marúdbhir agna ā́ gahi ‖
1.019.07a yá īṅkháyanti párvatān tiráḥ samudrám arṇavám |
1.019.07c marúdbhir agna ā́ gahi ‖
1.019.08a ā́ yé tanvánti raśmíbhis tiráḥ samudrám ójasā |
1.019.08c marúdbhir agna ā́ gahi ‖
1.019.09a abhí tvā pūrvápītaye sṛjā́mi somyám mádhu |
1.019.09c marúdbhir agna ā́ gahi ‖
1.020.01a ayáṃ devā́ya jánmane stómo víprebhir āsayā́ |
1.020.01c ákāri ratnadhā́tamaḥ ‖
1.020.02a yá índrāya vacoyújā tatakṣúr mánasā hárī |
1.020.02c śámībhir yajñám āśata ‖
1.020.03a tákṣan nā́satyābhyām párijmānaṃ sukháṃ rátham |
1.020.03c tákṣan dhenúṃ sabardúghām ‖
1.020.04a yúvānā pitárā púnaḥ satyámantrā ṛjūyávaḥ |
1.020.04c ṛbhávo viṣṭy àkrata ‖
1.020.05a sáṃ vo mádāso agmaténdreṇa ca marútvatā |
1.020.05c ādityébhiś ca rā́jabhiḥ ‖
1.020.06a utá tyáṃ camasáṃ návaṃ tváṣṭur devásya níṣkṛtam |
1.020.06c ákarta catúraḥ púnaḥ ‖
1.020.07a té no rátnāni dhattana trír ā́ sā́ptāni sunvaté |
1.020.07c ékam-ekaṃ suśastíbhiḥ ‖
1.020.08a ádhārayanta váhnayó 'bhajanta sukṛtyáyā |
1.020.08c bhāgáṃ devéṣu yajñíyam ‖
1.021.01a ihéndrāgnī́ úpa hvaye táyor ít stómam uśmasi |